नेपालगञ्ज, ४ जेठ । उच्च अदालत तुल्सीपुर-नेपालगञ्ज इजलासले चालु अर्थिक वर्षको साउनदेखि बैशाख महिनासम्म एक हजार ४२१ मुद्दा फछ्र्यौट गरेको छ । मुद्दा फछ्र्यौटको प्रतिशत ५६ दशमलव ८६ रहेको छ ।
आज नेपालगञ्जमा गरेको सञ्चारकर्मीसंगको अन्तरक्रियामा अदालतले उक्त अवधिमा गत वर्षको जिम्मेवारी सरेर आएका एक हजार १०९ र नयाँ दर्ता भएका एक हजार ३१० गरेर दुई हजार ४९९ मुद्दा मध्ये एक हजार ४२१ वटा मुद्दा फछ्र्यौट भएको जानकारी गराएको छ ।
उच्च अदालतका रजिष्ट्रार सरोजनिधि वाग्लेका अनुसार, एक हजार ७८ मुद्दा फछ्र्यौटका क्रममा रहेको छ ।
उक्त अवधिमा लागु औषधका २५१, अंश सम्बन्धि १७५, करणीका १५४, चोरी १०८, कर्तव्य ज्यानको १५, ज्यान मार्ने उद्योगका ६७, सम्बन्ध विच्छेदका ४७, रिट निवेदनको ३७८ र अन्य एक हजथार २२४ गरी दुई हजार ४९९ मुद्दा दर्ता भएका थिए ।
अन्तरक्रियामा मुख्य न्यायाधिश चन्द्रबहादुर सरुले मुद्दाको प्रकृति हेरर वर्गीकरण गरी ६ महिना, एक वर्ष र १८ महिनाभित्र मुद्दा फछ्र्यौट गर्ने समय तालिका मिलाएको, सप्टवेयरको प्रयोग गरेर पेशी तारिख दिने गरेको र न्यायाधिश गोला प्रथावाट छनौट गरेर काम गरिरहेको बताउनुभयो ।
कार्यक्रममा न्यायाधिशहरु गोविन्द जोशी, पूनमसिंह चन्द र किरणकुमारी गुप्ता, नेपाल पत्रकार महासंघ, बाँकेका अध्यक्ष दामोदर भण्डारी, पूर्व अध्यक्षहरु नीरज गौतम, झलक गैरेलगायतको सहभागिता रहेको थियो ।
