नेपालगञ्ज, ४ जेठ । अन्तर प्रदेशस्तरीय ‘विपद् पूर्व तयारी र प्रतिकार्यका लागि आपतकालीन कार्यसञ्चालन केन्द्रको संस्थागतीकरण’ विषयक कार्यशाला आज नेपालगञ्जमा गरिएको छ ।
सहरी विपद् तथा भूकम्पीय पूर्व तयारी परियोजना (सुपर) को सहयोगमा लुम्विनी प्रदेश आन्तरिक मामिला तथा कानुन मन्त्रालयले उक्त कार्यशाला गरेको हो ।
कार्याशालाका सहभागीहरुले विपद् क्षेत्र बढी संबेदनशील भएकाले यसको जोखिम न्यूनीकरण गर्न समुदायस्तरमा सचेतना र पूर्वतयारी संयन्त्र निर्माण हुनुपर्नेमा जोड दिएका थिए ।
कार्यक्रममा लुम्विनी प्रदेश आन्तरिक मामिला तथा कानून मन्त्रालयका विपद् शाखा प्रमुख मञ्जुकुमारी पोखरेलले प्रदेश सरकारले विपद् व्यवस्थापन सम्वन्धि बनेका ऐन तथा निर्देशिकालाई संशोधन र विपद् उद्धार खोज, राहत वितरण सम्वन्धि कार्यविधि र निर्देशिका निर्माण गरिरहेको छ भन्नुभयो ।
कार्यशालामा लुम्विनी, कर्णाली र सुदुरपश्चिम प्रदेश अन्तर्गत जिल्ला प्रशासन कार्यालयका विपद् फोकलपर्सन, विभिन्न सरोकारवाला निकायका प्रतिनिधि, सहरी विपद् तथा भूकम्पीय पूर्व तयारी परियोजना (सुपर) अन्तर्गतका कर्मचारी, विज्ञ लगायतको सहभागिता थियो ।
