नेपालगञ्ज, ४ जेठ । नेपाली कांग्रेस लुम्बिनी प्रदेश सभापति अमरसिंह पुनले सहकारी आर्थिक घोटाला प्रकरणमा गृहमन्त्रीमाथि छानवीन गर्न संसदीय समिति बनाउनुपर्ने माग दोहोर्याउनु भएको छ ।
नेपाल प्रेस युनियन लुम्बिनी प्रदेश कार्यसमितिले प्रकाशन गरेको २०८१ सालको भित्तेपात्रो (क्यालेण्डर) विमोचन कार्यक्रमलाई आज नेपालगञ्जमा सम्बोधन गर्दै सभापति पुनले सरकारमा सहभागि प्रमुख घटक नेकपा एमाले संसदीय समिति बनाउन डराएको छ भन्नुभयो ।
‘देशभरका सहकारीमा एमालेका ९० प्रतिशत बढी कार्यकर्ता सलग्न भएकाले समिति बन्यो भने आप्नै नेता कार्यकर्ता फस्ने डरले संसदीय समिति बनाउने कुरामा एमाले झस्किएको छ’—सभापति पुनले भन्नुभयो ।
सभापति पुनले नेपाली काँग्रेस र प्रेस युनियनबीच समन्वय र सहकार्य हुनुपर्नेमा जोड दिँदै पार्टीभित्रका समस्या समाधानमा प्रेस युनियनले सकारात्मक भूमिका खेल्न सक्नुपर्छ भन्नुभयो ।
कार्यक्रममा नेपाली कांग्रेस बाँकेका सभापति नारायणप्रसाद गौडेल, नेपाल प्रेस युनियनका केन्द्रीय अध्यक्ष शिव लम्साल, बरिष्ठ उपाध्यक्ष प्रेम केसी, रेडियो प्रशारक संघका केन्द्रीय अध्यक्ष अर्जुन गिरी, नेपाल पत्रकार महासंघ बागमती प्रदेश अध्यक्ष शिव देवकोटा, नेपाल प्रेस युनियन बाँकेका अध्यक्ष प्रियास्मृति ढकाल, पत्रकार महासंघ बाँके अध्यक्ष दामोदर भण्डारी, पत्रकार महासंघ प्रदेश महासचिव नवीन गिरीलगायतले बोल्नुभएको थियो ।
प्रेस युनियन लुम्बिनी प्रदेशका कार्यबहाक अध्यक्ष जयसिंह केसीको सभापतित्वमा कार्यक्रम सम्पन्न भएको थियो ।
