नेपालगञ्ज, ३ जेठ । यौन तथा प्रजनन् स्वास्थ्य सम्बन्धि सेवा र त्यसको प्रभावकारिता अपाङ्गतामैत्री हुनुपर्नेमा जोड दिइएको छ ।
नेपाल परिवार नियोजन संघ, बाँकेले आज नेपालगञ्जमा आयोजना गरेको ‘अपाङ्गता भएकाहरुको यौन तथा प्रजनन् स्वास्थ्यलाई प्रभावकारी बनाउन सञ्चारकर्मी, अपाङ्गता क्षेत्रका अधिकारकर्मी तथा सरोकारवाला निकायको भूमिका’ विषयक अन्तरक्रिया कार्यक्रमका सहभागिहरुले उक्त कुरामा जोड दिएका हुन् ।
अन्तरक्रियामा सहजकर्ता डेक नेपालका कार्यक्रम प्रबन्धक जीवन गिरीले अपाङ्गताको अधिकार र त्यसको नीतिगत व्यवस्था तथा सेवा सुविधाका बारे प्रस्तुत गर्नुभएको कार्यपत्रमाथि सहभागिहरुद्धारा व्यापक छलफल गरिएको थियो ।
सहभागिहरुले अपाङ्गता स्वास्थ्य सम्बन्धि सवाल सबैको साँझा मुद्दा बन्नुपर्ने, अपाङ्गताहरुको शिक्षादिक्षा र उनीको भरणपोषणमा राज्यको भूमिका थप प्रभावकारी हुनुपर्ने र सेवा, सुविधामा वृद्धि गर्नुपर्ने, मुलुकको समग्र विकास अवधारणामा अपाङ्गताका सवाललाई प्राथमिकतामा राख्नुपर्नेलगायतका सुझाव दिएका थिए ।
त्यस अवसरमा परिवार नियोजन संघ, बाँकेका सभापति बद्रेदुजा खाँ, शाखा प्रबन्धक रश्मी श्रेष्ठ, अधिकारकर्मी टेकराज जैसी, पत्रकार महासंघ, बाँकेका पूर्व अध्यक्ष नीरज गौतमलगायतका वक्ताहरुले बोल्नुभएको थियो ।
२०८१÷०२÷०३
