नेपालगञ्ज, ३० बैशाख । नेपाल दशनामी समाज बाँकेको आयोजनामा नेपालगञ्जमा आज जगतगुरु शंकाराचार्यको १२३७औं जन्मजयन्ती मनाइएको हो ।
कार्यक्रममा दशनामी समाजका जिल्ला अध्यक्ष गोपालप्रसाद गिरीले दशनामीहरुले आफ्ना गुरुलाई विशेष आस्था र सम्मानका साथ सम्झनुपर्नेमा जोड दिनुभयो ।
त्यस अवसरमा नेपाल दशनामी समाजका केन्द्रीय सल्लाहकार केशर गिरी, बागेश्वरी मन्दिरका मूल महन्त चन्द्रनाथ योगी, दशनामी समाजका पूर्व केन्द्रीय सचिव नारद पुरी, लुम्बिनी प्रदेश सचिव होमनाथ गिरी, हडियाबाबा मन्दिरका पुजारी सोमनाथ गिरी, ब्राहमण समाजका केन्द्रीय सदस्य पुष्पराज कँडेल, विश्व हिन्दु महासंघ बाँकेका भिम सापकोटा लगायतले बोल्नुभएको थियो ।
पूर्वीय दर्शनका एक विशिष्ट व्यक्तित्वको रूपमा आठौं शताब्दीको अन्तिमतिर भारतमा जन्मिएका जगतगुरु शंकराचार्य वेदान्त दर्शनको शांकर भाष्यका प्रणेता हुन् । इतिहासकारहरु शंकराचार्यको ७८८ ईस्वीमा जन्म भएको र ८२० ईस्वीमा मृत्यु भएको मान्दछन् ।
सानै उमेरदेखि तीक्ष्ण बुद्धिको मानिएका शंकराचार्यले आफ्नो ८ वर्षको उमेरमा चारै वेद कण्ठ पार्नुभएको थियो । दश वर्षको उमेरमा आचार्य शङ्करले सनातन हिन्दु धर्मको समन्वय र पुनरुत्थान गर्ने संकल्प लिएर देशव्यापी भ्रमण सुरु गर्नुभयो । उहाँ अत्यन्त चिन्तनशील व्यक्ति हुनुहुन्थ्यो । ३२ वर्षको उमेरमा नै मृत्युवरण भोगेका शंकराचार्य वेदान्तको शांकर मतका प्रवर्द्धक समेत हुनुहुन्छ ।
