कोहलपुर (बाँके), २५ वैशाख । बाँके क्षेत्र नं. १ का प्रतिनिधि सभा सदस्य सूर्यप्रसाद ढकालले कोहलपुरको विकासमा सबै पक्ष एकजुट हुनुपर्नेमा जोड दिनुभएको छ ।
कोहलपुर नगरपालिकाको ११ औं स्थापना दिवसका अवसरमा आज आयोजित कार्यक्रममा प्रतिनिधि सभा सदस्य ढकालले भन्नुभयो-‘राजनीतिकमा दलिय खिचातानी चलिरहन्छ, तर यसले विकास प्रक्रियालाई भने प्रभाव पार्नु हुन्न, कोहलपुर नगर क्षेत्रका राजनीतिक नेता, कार्यकर्ता तथा जनप्रतिनिधिले यही कुरा मनन गर्न जरुरी छ ।’
कोहलपुरको समग्र विकासका लागि मूलतः आर्थिक तथा सामाािजक विकासको ढोका खोल्नुपर्ने खाँचो औल्याउदै सांसद ढकालले कोहलपुरका जनप्रतिनिधिहरुमा यसको पहिलो जिम्मेवारी रहेको छ भन्नुभयो ।
कार्यक्रममा लुम्विनी प्रदेशका सासंस दुर्गाप्रसाद चौधरीले कोहलपुरको विकासका लागि सर्वपक्षिय छलफल आवश्यक रहेको छ भन्दै विकासका सम्भावनाका बहसलाई सकारात्मक रुपमा लिनुपर्नेमा जोड दिनुभयो ।
कोहलपुरका मेयर पूर्णप्रसाद आचार्यले कोहलपुर नगर कार्यपालिका कोहलपुरको वृह्त्तर विकासका निमित्त योजनबद्ध भइ अघि बढिरहेको छ भन्नुभयो । उहाँले कोहलपुरलाई आधुनिक सहर र शैक्षिक हब बनाउने सवालमा प्राथमिकताका साथ काम भइरहेको उल्लेख जानकारी गराउनुभयो ।
कार्यक्रममा उपमेयर संगिता सुवेदी, पूर्व मेयर लुटबहादुर रावत, खजुरा गाउँपालिकाका उपाध्यक्ष मञ्जु मल्ल, नेपाली काँग्रेसका जिल्ला सभापति नारायणप्रसाद गौंडेल, नेकपा एमाले नगर अध्यक्ष कुलप्रसाद भट्टराई, नेकपा माओवादी केन्द्रका नगर अध्यक्ष अवराज खडका, राष्ट्रिय स्वतन्त्र पार्टीका लुम्विनी प्रदेश संयोजक डा. राजकुमार सुवेदी, नेकपा एकिकृत समाजवादीका केन्द्रीय सदस्य अब्दुलहुसेन खाँ, राष्ट्रिय प्रजातन्त्र पार्टीका जिल्ला सचिव रुद्रमणि न्यौपाने, प्याब्सन बाँकेका अध्यक्ष यम रावत लगायत बक्ताहरुले बोल्नुभएको थियो ।
कार्यक्रममा दौड प्रतियोगिताका उत्कृष्ट छात्रछात्रा, राष्ट्रपति रनिङशिल्डका पदक विजेता, नृत्य, वक्तृत्वकला, कविता र ब्याटमिन्टन प्रतियोगिता, उत्कृष्ट करदाता, उत्कृष्ट कर्मचारी, उत्कृष्ट नगर प्रहरी, हरित अभियानमा सहयोग पुर्याउने व्यक्ति तथा संस्था, शैक्षिक सत्र २०७९÷८० मा एसइई र विएलईमा उत्कृष्ट हुनेलाई पुरष्कृत तथा सम्मान गरिएको थियो ।
त्यसैगरी, उत्कृष्ट बालविकास शिक्षक, कर्मचारी तथा शिक्षकहरुलाई प्रोत्साहन तथा सम्मान गरिएको थियो । कार्यक्रममा विभिन्न कला संस्कृति झल्कने सल्यानी टप्पा नाँच, देउडा नाँच र थारु नाच समेत प्रदर्शन गरिएको थियो ।
कोहलपुर नगरपालिकाका प्रेस संयोजक प्रियास्मृति ढकालले संचालन गरेको उक्त कार्यक्रममा जिल्ला समन्वय समिती बाँकेकी उपप्रमुख सीता कार्की, शसस्त्र प्रहरी बल जवान तालिम शिक्षालय नौवस्ताका सशस्त्र प्रहरी वरिष्ठ उपरिक्षक प्रविण कँडेल, कोहलपुर नगर पालिकाका प्रमुख प्रशासकीय अधिकृत धोलकराज ढकाल, बाँके प्रहरी प्रमुख तुल वहादुर कार्कीलगायतको सहभागिता रहेको थियो ।
