नेपालगञ्ज, १७ बैशाख । सिटिजन्स बैंक इन्टरनेशनल लिमिटेडले नेपालगञ्जको फातिमा फाउण्डेशनलाई २० वटा सिलाई मेसिन निशुल्क उपलव्ध गराएको छ ।
विगत १७ वर्षदेखि नेपाली सर्वसाधारण ग्राहकवर्गको घरदैलोमै बैकिङ्ग सेवा पुर्याउदै आएको बैकले संस्थागत सामाजिक उत्तरदायित्व कार्यक्रम अन्तर्गत सिलाई मेसिन उपलव्ध गराएको बैंकका नायब प्रमुख कार्यकारी अधिकृत पारसकुमार काप्लेले जानकारी दिनुभयो ।
फातिमा फाउण्डेशनको कार्यालयमा आज आयोजित कार्यक्रममा बैंकका प्रमुख कार्यकारी अधिकृत गणेशराज पोखरेलले फाउण्डेशनका अध्यक्ष मैमुना सिद्धिकीलाई सिलाई मेसिन हस्तान्तरण गर्नुभयो । त्यस अवसरमा प्रमुख कार्यकारी अधिकृत पोखरेलले बैंकको सानो सहयोगवाट महिलाहरुको आर्थिक जीवनस्तरमा सुधार आउने विश्वास व्यक्त गर्नुभयो ।
सिटिजन्स बैंकले सामाजिक उत्तरदायित्व कार्यक्रम अन्तर्गत आर्थिक, सामाजिक, सांस्कृतिक, शैक्षिकलगायतका क्षेत्रमा सकारात्मक परिवर्तन ल्याउन विभिन्न कार्यक्रम गर्दै आएको छ । बैंकले देशैभरका आप्ना १९० शाखा, १५३ एटिएम र ९८ वटा शाखारहित बैंकिङ्ग इकाईवाट १७ लाख ३० हजार ग्राहकलाई आधुनिक बैंकिङ्ग सेवा प्रदान गर्दै आएको दावी गरेको छ ।
हाल ५५ जिल्लामा आप्नो सेवा प्रवाह गर्दै आएको सिटिजन्स बैंकले यसै आर्थिक वर्षभित्र सात वटा शाखा थप गर्नुका साथै ६० जिल्लामा सेवा प्रदान गर्ने लक्ष्य लिएको बैंकका नायब प्रमुख कार्यकारी अधिकृत काप्लेले बताउनुभयो ।
सिलाई मेसिन हस्तान्तरण समारोहमा बैंकका कलस्टर प्रमुख विनय गौतम, नेपालगञ्ज शाखा प्रमुख गोविन्ददेव पन्त, कोहलपुर शाखा प्रमुख दिनेशकुमार ढुंगानालगायतको सहभागिता रहेको थियो ।
