नेपालगञ्ज, १० बैशाख । नेपालगञ्ज उपमहानगरपालिका शिक्षा महाशाखा अन्तर्गतको टोलीले संस्थागत विद्यालयको शुल्क कार्यान्वयनको अवस्थाबारे अनुगमन शुरु गरेको छ ।
संस्थागत विद्यालयले तोकिएको शुल्क कार्यान्वय गरे÷नगरेको अवस्था बारे महाशाखाले अनुगमन शुरु गरेको हो ।
नेपालगञ्ज उपमहानगरपालिकाले ‘क’, ‘ख’ र ‘ग’ गरी संस्थागत विद्यालयलाई तीन तहमा वर्गीकरण गरी शुल्क निर्धारण गरेको छ ।
आज सोफिया रेसिडेन्सियल स्कुल, आदर्श माध्यमिक विद्यालय र युनाइटेड एजुकेशनल एकेडेमीको अनुगमन गरेको शिक्षा महाशाखा प्रमुख गोर्खबहादुर थापाले जानकारी दिनुभयो ।
यस्तै अनुगमन टोलीले पाठ्यक्रम विकास केन्द्रले तोके बमोजिम पाठ्यपुस्तक लागु गरे÷नगरेको अवस्थाबारे पनि जानकारी लिएको थापाले बताउनुभयो ।
मेयर प्रशान्त विष्ट नेतृत्वको अनुगमन टोलीमा उपमेयर कमरुद्दिन राई, प्रमुख प्रशासकीय अधिकृत ओमबहादुर खड्का, शिक्षा महाशाखा प्रमुख थापा, शिक्षा अधिकृत लोकेन्द्र शाही तथा शिक्षा समिति सदस्यहरु गोकर्ण आचार्य, मनोजराजा श्रीवास्तव, रमेश श्रीवास्तव र विकास बज्राचार्यको सहभागिता थियो ।
अनुगमनकै क्रममा मेयर विष्टले शैक्षिक सुधारका लागि नेपालगञ्ज उपमहानगरपालिका संवेदनशील रहेको भन्दै विद्यालयहरु नीति, नियमको पालना र दायित्वबोधप्रति गम्भीर हुनुपर्नेमा जोड दिनुभयो । मेयर विष्टले भन्नुभयो, ‘शिक्षा समितिले तोकेकोभन्दा बढी शुल्क लिएको पाइएमा त्यस्ता विद्यालयलाई रु ५० हजार जरीवानाको निर्णय गरेको छ ।
