नेपालगञ्ज, ६ बैशाख । बाँकेको डुडुवा गाउँपालिका वडा नं. ४ का स्थानीयलाई किटनाशकयुक्त झुल वितरण गरिएको छ । उक्त वडामा औलोको जोखिम बढी देखिएपछि स्थानीयलाई निःशुल्क झुल वितरण गरिएको हो ।
सोही वडामा केही दिनअघि दुई जनामा औलो रोग पुष्टि भएपछि उच्च सर्तकताका साथ स्वास्थ्य शिक्षासंगै सावधानीका लागि झुल वितरण गरिएको हो ।
पालिका स्वास्थ्य शाखा प्रमुख हेमन्त शर्माका अनुसार, उक्त वडा अन्तर्गत करिब एक हजार २०० घरधुरीलाई तीन हजार ५९९ किटनाशकयुक्त झुल वितरण गरिएको छ ।
गाउँपालिका उपाध्यक्ष शाहिदा बानो र वडाध्यक्ष सागिर खाँले स्थानीयलाई झुल वितरण गर्दै औलो रोगको सम्वेदनशीलतालाई बिचार गरेर स्थानीयले सावधानी अपनाउनुपर्नेमा जोड दिनुभयो ।
स्वास्थ्य मन्त्रालय इपिडिमियोलोजी तथा रोग नियन्त्रण महाशाखाको सहयोगमा स्वास्थ्य कार्यालय र स्थानीय तहको सयुक्त पहलमा डुडुवा गाउँपालिकामा किटनाशक झुल वितरण र जनचेतनामुलक कार्यक्रम गरिएको छ ।
यसैगरी, वैशाख ६ र ७ गते बालबालिकालाई भिटामिन ‘ए’ खुवाउने राष्ट्रिय अभियान अन्तर्गत डुडुवा गाउँपालिकाले पनि आज भिटामिन ‘ए’ कार्यक्रम सञ्चालन गरेको छ ।
भिटामिन ‘ए’ क्याप्सुल छ महिनादेखि पाँच वर्षमुनिका बालबालिका तथा जुकाको औषधि एक वर्षदेखि पाँच वर्षसम्मका बालबालिकालाई खुवाइनेछ । पालिकाका विभिन्न वडामा स्वयम्सेविकामार्फत औषधी खुवाइएको स्वास्थ्य शाखाका पवन कुमार कैराँतीले बताउनुभयो ।
