नेपालगञ्ज, ५ बैशाख । एसिसी प्रिमियर कप २०२४ को सेमिफाइनलमा पुगिसकेको नेपालले समूह “ए“ अन्तर्गतको अन्तिम खेलमा साउदी अरेबियालाई हराएको छ ।
ओमानमा जारी आजको खेलमा साउदी अरेबियालाई नेपालले ६ विकेटले पराजित गरेको हो । यो लगातार नेपालको चौथो जित हो ।
प्राविधिक कारणले २० ओभरलाई ८ ओभरमा झारिएको खेलमा नेपालले टस जितेर साउदी अरेबियालाई पहिलो ब्याटिङको निम्तो दिएको थियो । साउदीले ८ ओभर खेल्दै ७ विकेट गुमाएर ७३ रन बनाएको हो ।
जितका लागि ७४ रनको चुनौतिको सामना गर्न मैदान उत्रिएको नेपालले ७ दशमलव २ ओभरमा ४ विकेट गुमाउँदै ७५ रन बनाएको थियो । नेपालका लागि अविजित रहँदै गुल्शन झाले सर्वाधिक १९ बलमा ३२ र कप्तान रोहित पौडेलले ७ बलमा १६ रन बनाए । दीपेन्द्रसिंह ऐरीले १७ रन बनाए । ओपनर कुशल भुर्तेल शुन्यमा तथा आशिफ शेख र कुशल मल्ल २–२ रन बनाएर आउट भएका हुन् ।
आजको जितसँगै नेपाल आफ्नो समूहमा सबै खेल जित्ने एक मात्र राष्ट्र बन्दै समूह विजेता बनेर अन्तिम चारमा पुगेको छ । यसअघिको पहिलो खेलमा नेपालले मलेसियालाई ५ विकेट , कतारलाई ३२ रन र हङकङलाई ८ विकेटले पराजित गरेको थियो ।
नेपाल रहेको समूह ए मा कतार, साउदी अरेबिया, हङकङ र मलेसिया र हङकङ रहेको समूहबाट नेपाल समूह विजेता र हङकङ उपविजेता बन्दै सेमिफाइनलमा प्रवेश गरेका छन् ।
सेमिफाइनलमा दुबै समूहका विजेता र उपविजेता टोली सेमिफाइनलमा जानेछन र दुई टोली फाइनलको यात्रा गर्नेछन् । फाइनल विजेता राष्ट्र आगामी एसिया कपमा सिधै छनौट हुनेछ ।
