नेपालगञ्ज, ४ बैशाख । बाँकेको डुडुवा गाउँपालिकाले सामाजिक सुरक्षा भत्ता वितरण सुरु गरेको छ । पालिकाले चालू आर्थिक बर्ष २०८०-०८१ को दोस्रो र तेस्रो त्रैमासिक अन्तर्गत कात्तिकदेखि चैत महिनासम्मको भत्ता वितरण गरेको हो ।
गाउँपालिकाको वडा नं. १ र २ मा आज भत्ता वितरण गरिएको थियो । वार्ड नं. २ का वडाध्यक्ष दुर्गाप्रसाद बर्माले जेष्ठ नागरिकलाई रकम हस्तान्तरण गर्दै भत्ता वितरण कार्यको शुभारम्भ गर्नुभयो ।
नागरिकलाई सहजताका लागि यस वर्ष बैंकका कर्मचारीहरु वडावडामा पुगेर भत्ता वितरणको कार्य सुरु गरेको पालिका अध्यक्ष नरेन्द्रकुमार चौधरीले बताउनुभयो ।
अध्यक्ष चौधरीले भत्ता वितरण प्रक्रियामा बैंिकङलगायत प्राविधिक समस्याले स्थानीयको घरघरमै पुगेर वितरण गर्न नसक्नु दुखद कुरा भएको भन्दै त्यसको विकल्पमा बैंकलाई वडामै बोलाएर वितरण गर्न लागेको बताउनुभयो । तर अझै एउटा बैंकले वार्ड नं. ५ र ६ मा गएर भत्ता बाड्न नसक्ने बताएकाले समस्या भएको चौधरीको भनाई छ ।
पालिकाको वडा नं. १ र २ का ज्येष्ठ नागरिकहरुको नेपाल इन्भेष्टमेन्ट मेगा बैंक, वार्ड नंं. ३ र ४ को कुमारी बैंक र वार्ड नं. ५ र ६ को ज्योति विकास बैंकमा खाता खोलिएको छ ।
दुई वटा बैंकले गाउँमै पुगेर सार्वजनिक स्थान तथा कार्यालयबाट भत्ता वितरण गरिरहेका छन भने ज्योति विकास बैंकले कर्मचारीको अभाव भन्दै बैंकमै लिन आउन भनेको गाउँपालिकाका एमआइएस अपरेटर कौशलकुमार कैराँतीले बताउनुभयो ।
