नेपालगञ्ज, २७ चैत । नेपालगञ्जमा लुप्त अवस्थामा रहेका क्षयरोगीको खोजपडताल गरिने भएको छ । नेपालगञ्ज उपमहानगरपालिकाको स्वास्थ्य महाशाखा प्रमुख रामबहादुर चन्दका अनुसार, क्षयरोगी पहिचान गर्न नगरका सबै वडामा स्वयंसेवक खटाइने छ ।
क्षयरोगीको खोज पडताल गर्न प्रत्येक वडामा एक÷एक जना स्वय्मसेवक खटाइने चन्दले जानकारी दिनुभयो । नेपालगञ्जमा २३ वडा रहेको छ ।
नेपालगञ्जलाई क्षयरोगमुक्त पालिका घोषणा गर्न लुप्त अवस्थामा रहेका क्षयरोगीको खोजपडताल अभियान सञ्चालन गरिएको हो । उक्त अभियानका लागि जनप्रतिनिधिहरुलाई अभिमुखीकरण गरिएको छ ।
तथा पालिकास्तरीय समिति गठन कार्यक्रममा चन्दले यसपछि वडा वडामा वडास्तरीय समिति बनाएर क्षयरोगमुक्त घोषणा अभियान सञ्चालन गर्ने जानकारी दिए ।
क्षयरोग अन्त्य गर्ने लक्ष्य हासिल गर्न समुदायमा रहेका सम्भावित क्षयरोगका विरामीहरुको द्रुत पहिचान, रोकथाम, निदान र उपचारको लागि क्षयरोगमुक्त पालिका पहल कार्यक्रम सञ्चालन गरिएको छ ।
तथ्यांक अनुसार, बाँकेमा ५३९ क्षयरोगी छन् । जसमध्ये नेपालगञ्जमा ४०४ जना क्षयरोगी रहेको अनुमान गरिएपनि १८० क्षयरोगीको मात्र पहिचान भएको छ । चन्दका अनुसार लुकेर रहेको अवस्थाका ५६ प्रतिशत क्षयरोगी खोज्न अभियान चलाउन थालिएको हो ।
नेपालबाट सन् २०५० सम्ममा क्षयरोग उन्मूलन गर्ने लक्ष्य छ भने सन् २०३५ सम्ममा क्षयरोगको महामारी अन्त्य गर्ने लक्ष्य निर्धारण गरिएको छ । नेपालमा क्षयरोगबाट हुने मृत्युदर ३ प्रतिशत रहेको छ । लुम्बिनी प्रदेशमा ३ दशमलव ३ र बाँकेमा २ दशमलव ८ प्रतिशत क्षयरोगीको मृत्यु हुने गरेको छ ।
