नेपालगञ्ज, २७ चैत । नेपाल पत्रकार महासंघले सदस्यता विवाद टुंगो लगाएर मात्र अधिवेशन तथा साधारणसभा गर्न नेपाल प्रेस युनियन बाँकेले माग गरेको छ ।
पत्रकार महासंघको सदस्यता टुंगो नलगाई साधारणसभा तथा अधिवेशनसहितका कुनैपनि प्रक्रिया अगाडि नबढाउन महासंघ बाँके शाखासँग प्रेस युनियन बाँकेले आग्रह गरेको हो ।
नेपाल पत्रकार महासंघले शुद्विकरण अभियानलाई थाँती राख्दै जिल्ला, प्रदेश र केन्द्रीय अधिवेशन घोषणा गरेकोप्रति गम्भीर ध्यानाकर्षण भएको जनाउँदै प्रेस युनियन बाँकेले महासंघ बाँके शाखा अध्यक्ष दामोदर भण्डारीलाई आज ज्ञापन पत्र बुझाएको छ ।
प्रेस युनियन बाँके शाखा अध्यक्ष प्रियास्मृति ढकाल, उपाध्यक्ष कमल खत्री र सचिव भिष्म लोधसहितको टोलीले महासंघ अध्यक्ष भण्डारीलाई ज्ञापनपत्र बुझाएको हो । ज्ञापनपत्रमा अधिवेशन घोषणा निर्णयबाट शुद्विकरण अभियान प्रभावित हुने ठहर गरिएको छ ।
प्रेस युनियन केन्द्रीय समितिको मिति २०८० चैत १७ गते सुनसरीको इटहरीमा सम्पन्न बैठकले पत्रकार महासंघले सदस्यता र मतदाता नामालीको टुंगो लगाएर मात्र नेपाल पत्रकार महासंघका जिल्ला, प्रदेश र केन्द्रको अधिवेशन÷साधारणसभा गर्न निर्णय गरेको छ । सो निर्णय बमोजिम पत्रकार महासंघको अधिवेशन—साधारणसभा गर्न महासंघलाई आग्रह समेत गरेकोे छ ।
साथै महासंघ केन्द्रीय कार्यालय, लुम्विनी प्रदेश कार्यालयलाई बोधार्थ पत्रमार्फत महासंघले प्रेस युनियनको माग विपरित अधिवेशन÷साधारण सभालगायत कुनैपनि प्रक्रिया अगाडि बढाएमा सो कार्यको कडा प्रतिवाद गरिने समेत चेतावनी दिइएको छ ।
