नेपालगञ्ज, २६ चैत । नेपालगञ्जमा माटो परीक्षण शिविर सञ्चालन गरिएको छ । नेपालगञ्ज उपमहानगरपालिकाले सञ्चालन गरेको माटो परीक्षण शिविरमा माटोको जाँच गरी त्यसको अवस्थाबारे किसानलाई अवगत गराइएको छ ।
माटोको अवस्था नबुझेरै जथाभावी रासायनिक मलको प्रयोगका कारण माटोको गुणस्तर र उर्वराशक्ति घटिरहेकाले त्यसको नियन्त्रणका लागि माटो परीक्षण शिविर सञ्चालन गरिएको कृषि शाखा प्रमुख अम्बिका रिजाले बताउनुभयो ।
शाखा प्रमुख रिजालका अनुसार, माटो तथा मल परीक्षण केन्द्र खजुराका विज्ञ टोलीद्वारा माटो परीक्षण गरिएको हो । माटो तथा मल परीक्षण केन्द्र खजुराका प्रमुख कोमल शाही नेतृत्वको विज्ञ टोलीले माटो परीक्षण गरेका थिए । कृषकलाई जम्मा गरेर माटो परीक्षण प्रक्रियाका बारेमा अभिमुखीकरण र शिविर सञ्चालन गरेर माटो परीक्षण गरिएको थियो ।
अभिमुखीकरणमा नमुना संकलन कसरी गर्ने, कस्तो माटो परीक्षण गराउने, के के उल्लेख गर्ने लगायतका विषयमा कृषकलाई सिकाइएको छ ।
माटो परीक्षण शिविरमा नेपालगञ्ज उपमहानगरपालिकाका आर्थिक विकास समिति संयोजक गोपाल पुनले शिविरबाट किसानहरुले माटोको वास्तविक अवस्थाबारे जानकारी पाउने विश्वास व्यक्त गर्नुभयो ।
पुनका अनुसार, नेपालगञ्ज वडा नम्बर १९ मा ८० जना कृषकको माटो परीक्षण गरिएको भने अब वडा नम्बर २३ मा माटो परीक्षण शिविर सञ्चालन गरिने छ ।
