नेपालगञ्ज, २१ चैत । ‘पठाओ’ को ‘बाइक राइड’ सेवा नेपालगन्जमा पनि सञ्चालन हुने भएको छ ।
राइड सेयरिङ व्यवसायीक कम्पनी पठाओले नेपालगञ्जलगायत मुलुकभरका १७ शहरमा ‘बाइक राइड’ सेवा बिस्तार गर्न लागेको हो ।
हाल बागमती प्रदेशको काठमाडौँ उपत्यका र चितवनमा मात्रै पठाओको सेवा सञ्चालनमा रहेकोमा नेपालगञ्जलगायतका शहरमा छिट्टै सेवा विस्तार गर्न लागिएको पठाओ नेपालका प्रबन्ध निर्देशक असिममान सिंह बस्न्यातले जानकारी दिनुभयो ।
बस्न्यातका अनुसार राइड सेयरिङ सेवाको पर्याय बनेको पठाओको सेवा अब लुम्बिनी प्रदेशको नेपालगञ्ज, बुटवल, भैरहवा तथा सुदूरपश्चिम प्रदेशको धनगढीमा पठाओको सेवा बिस्तार हुन लागेको हो ।
त्यस्तै कोशी प्रदेशका नौ शहरहरु बिराटनगर, दमक, उर्लाबारी, बिराटचोक, इटहरी, इनरुवा, धरान, बिर्तामोड, भद्रपुर, मधेस प्रदेशको वीरगञ्ज, जनकपुर, बागमती प्रदेशको हेटौँडा, गण्डकी प्रदेशको पोखरालगायत अन्य सहरमा पनि सेवा बिस्तार गर्ने कम्पनीको योजना रहेको छ ।
प्रबन्ध निर्देशक बस्न्यातले भन्नुभयो, ‘नजिकैको एक शहरबाट अर्को शहरमा जान इन्टर सिटी बुकिङ समेत गर्न मिल्ने गरी पठाओको सेवा बिस्तार गर्न लागेका छौँ ।’ बस्न्यातका अनुसार सेवा बिस्तार गर्न लागिएका सहरमा बाइक राइडर दर्ताको प्रक्रिया सुरु भइसकेको छ ।
हाल पठाओको विभिन्न सेवामा दुई लाख बढी ब्यक्ति आबद्ध छन् । एक लाख ९० हजारभन्दा बढी बाइक राइडर, १० हजारभन्दा बढी क्याप्टेन (ट्याक्सी चालक) र फुड डेलिभरीमा ५ हजार बढी दर्ता भइसकेको जनाइएको छ ।
