नेपालगञ्ज, २० चैत । नेपालगञ्ज रंगशालामा रहेको स्विमिङ्ग पुल आज मंगलवारवाट सर्वसाधारणका लागि खुल्ला गरिएको छ ।
गर्मी महिना सुरु भएपछि यो सिजनका लागि स्विमिङ्ग पुल खुल्ला गरिएको साविक मध्यपश्चिम खेलकुद विकास समितिका कार्यालय प्रमुख महेश चन्दले बताउनुभयो ।
नेपालगञ्ज रंगशालाको स्विमिङ्ग पुलमा एकैपटक ५०० जना पौडन सक्ने छन् भने स्विमिङ्ग पुललाई अन्तर्राष्ट्रिय मापदण्ड अनुसार बनाइएको छ ।
स्विमिङ्ग पुल प्रयोग गरेवापत सर्वसाधारणका लागि रु २०० र सामूहिकरुपमा आउने विद्यार्थीका तथा राष्ट्रिय खेलाडीका रु १०० शुल्कको व्यवस्था गरिएको छ भने अन्तराष्ट्रिय खेलाडीले कुनै शुल्क तिर्नु पर्दैन ।
यसैबीच, नेपालगञ्ज रंगशाला परिसरमा रहेको हनुमानजीको मन्दिरमा आज हवन पूजा गरिएको छ । राष्ट्रिय खेलकुद परिषद्का सदस्य दिपेन्द्र विष्ट हवन पूजामा सहभागि हुनुभएको थियो ।
२०४२ सालमा स्थापना गरिएको रंगशालामा सोही वर्ष हनुमानजीको मन्दिर स्थापना गरिएको थियो । त्यसयता मन्दिरमा खासै पूजाअर्चना नहुने गरेकाले हवन पूजा लगाउनुपरेको कार्यालय प्रमुख चन्दले बताउनुभयो ।
हवन पूजामा बाँकेका प्रमुख जिल्ला अधिकारी श्रवणकुमार पोखरेल, बाँकेका प्रहरी प्रमुख प्रहरी उपरीक्षक सुभाष बोहरा, खेलकुद पदाधिकारी, खेलाडी, पत्रकारलगायतको उपस्थितति रहेको थियो ।
कार्यालय प्रमुख चन्दका अनुसार, अबदेखि मन्दिरमा नियमित पूजापाठ हुने व्यवस्था मिलाइएको छ ।
