नेपालगञ्ज, १७ चैत्र । नेपालगञ्जमा आज शनिवार सम्पन्न मध्यपश्चिम स्रष्टा समाजको पाँचौ साधारणसभाले कवि विपी अस्तुको अध्यक्षतामा नौ सदस्यीय नयाँ कार्यसमिति सर्वसम्मतरुपमा चयन गरेको छ ।
साधारणसभाले अस्मिता शाह, छत्रपति सिंह, निर्मल सुवेदी, विनोद देवकोटा, जयकेश सिंह, सावित्री गिरी, जहीरुल हक जीनु र भागवत पौडेललाई सदस्यहरुमा चयन गरेको निर्वाचन अधिकृत देवीदत्त देवकोटाले जानकारी दिनुभयो । समाजको विधान अनुसार, साधारणसभाले अध्यक्ष र सदस्यहरुको चयन गर्ने र पदाधिकारीको चयन अध्यक्षले निर्वाचित सदस्यहरुबाट गर्ने व्यवस्था रहेको छ ।
मध्यपश्चिम स्रष्टा समाजले नेपालगञ्जको इतिहास समेटिएको पुस्तक सद्भावको सहर नेपालगन्ज, प्रेम प्रकाश मल्लको अभिनन्दन ग्रन्थ पीडाको सगरमाथा, सनत रेग्मी सृजन सन्दर्भ, भोजराज शर्मा नादिरको गजल संग्रह अलिअलि मुर्छन्ना अलिअलि होस लगायत दर्जनबढी पुस्तक प्रकाशन गरेको छ । त्यस्तै, सृजना साहित्यिक पत्रिका पनि समाजले प्रकाशन गर्दै आएको छ ।
अध्यक्ष शुक्रऋषि चौलागाईंको अध्यक्षता र नेपाल प्रज्ञा प्रतिष्ठानका प्राज्ञ परिषद सदस्य डा. मधुसुदन गिरीको प्रमुख आतिथ्यतामा साधारणसभाको उद्घाटन कार्यक्रम सम्पन्न भएको थियो ।
कार्यक्रममा डा गिरीले मध्यपश्चिम स्रष्टा समाजले गरेको कामको प्रशंसा गर्दै आगामी दिनमा नयाँ प्रतिभालाई खोजी गर्ने र योगदान दिइसकेका स्रष्टाहरुलाई यथोचित सम्मान गर्न सुझाव दिनुभयो ।
विशिष्ट अतिथि वरिष्ठ कथाकार सनत रेग्मीले मध्यपश्चिम स्रष्टा समाजले गरेका प्रकाशनहरु अहिले सन्दर्भ सामग्री बनिरहेको उदाहरण दिँदै आगामी दिनमा थप उपयोेगी प्रकाशनहरु गर्न सुझाव दिनुभयो ।
त्यस अवसरमा लुम्बिनी प्राविधिक विश्वविद्यालयका सेवा आयोग सदस्य प्राध्यापक डा. कृष्णप्रसाद घिमिरे, प्रज्ञा प्रतिष्ठानका प्राज्ञ सभा सदस्यहरु महानन्द ढकाल र शशीराम कार्कीलगायतका वक्ताहरुले पनि बोल्नुभएको थियो ।
