नेपालगञ्ज, १६ चैत । दिसाजन्य लेदो व्यवस्थापनका लागि नेपालगञ्ज वडा नं. २० बाबाघाटमा आजदेखि अस्थायी ट्रेन्च केन्द्र सञ्चालनमा ल्याइएको छ ।
एसएनभी नेपालको स्वास्थ्य तथा विकासको लागि नगर सरसफाई तथा स्वच्छता कार्यक्रम अन्तर्गत वास एसडिजी परियोजनाको आर्थिक तथा प्राविधिक सहयोगमा उक्त केन्द्र निर्माण गरिएको हो ।
उक्त अस्थायी ट्रेन्च केन्द्र सञ्चालनमा आएपछि नेपालगञ्जको बर्षौंदेखिको लेदोजन्य व्यवस्थापनको समस्या अब अन्त्य हुने विश्वास गरिएको छ ।
सोही स्थानमा आज आयोजित कार्यक्रममा नेपालगञ्जका मेयर प्रशान्त विष्ट र एसएनभी नेपालकी वास लिडर नादिरा ख्वाजाले केन्द्र सञ्चालनको शुभारम्भ गर्नुभयो ।
कार्यक्रममा मेयर विष्टले खुला ठाउँमा दिसाजन्य फोहोर फाल्दा त्यसले पानीको सतहलाई समेत प्रदूषित पार्ने र संक्रामक रोगको महामारी फैलिने जोखिम टरेको बताउनुभयो ।
एसएनभीकी वास टिम लिडर ख्वाजाले केन्द्र सञ्चालनमा आएपछि नेपालगञ्ज उपमहानगरपालिकाको सुरक्षित दिसाजन्य लेदो ब्यवस्थापनको प्रयासलाई यसले सहयोग पुर्याउने विश्वास ब्यक्त गर्नुभयो ।
कार्यक्रममा नेपालगञ्ज उपमहानगरपालिकाका उपमेयर कमरुद्दिन राई, प्रमुख प्रशासकीय अधिकृत ओमबहादुर खड्का, विपद् तथा वातावरण समिति संयोजक एवम् वडा नम्बर ६ का अध्यक्ष समिरप्रताप सिंह, वडा नं. २० का अध्यक्ष कौशलकुमार धोबी, वातावरण शाखा प्रमुख प्रकाश डिसीलगायतको उपस्थिति थियो ।
एसएनभीका कन्सल्टेन्ट इन्जिनीयर मुनबहादुर खड्काका अनुसार रु २४ लाख लागतमा निर्माण गरिएको दिसाजन्य लेदो ब्यवस्थापन अस्थायी केन्द्रको जग्गा पाँच बर्षका लागि लिजमा लिइएको हो । दिसाजन्य लेदो व्यवस्थापनका लागि दुई विगाहा क्षेत्रफलमा ४० मिटर लम्बाई, दुई मिटर उचाई र एक दशमलव २० मिटर चौडाइको १७ वटा खाल्डा खनिएको इन्जिनीयर खड्काले जानकारी दिनुभयो ।
