नेपालगञ्ज, १५ चैत । नेपाली काँग्रेस बाँकेले बैशाख १५ गतेभित्र क्रियाशील सदस्यता नवीकरण गरिसक्न तल्लो तहलाई परिपत्र गर्ने निर्णय गरेको छ ।
पार्टीका कार्यबाहक सभापति गोपालप्रसाद अधिकारीको सभापतित्वमा आज विहिबार बसेको जिल्ला कार्यसमितिको बैठकले उक्त निर्णय गरेको हो ।
बैठकले विधानतः सबै तहले गर्नुपर्ने वडादेखि क्षेत्रसम्मको बार्षिक सम्मेलन बैशाख मसान्तसम्म गरिसक्न निर्देशनसमेत दिएको छ । यस्तै बैठकले जिल्लामा कार्यक्रमहरु गरिँदा संस्थापक नेताहरुको फोटो मात्र राख्ने गरिएकोमा अबदेखि संविधानका पिता सुशील कोइरालाको फोटो पनि राख्ने निर्णय गरेको छ ।
यस्तै, पार्टीका पूर्व जिल्ला सभापति गजेन्द्रबहादुर हमालले महासमिति सदस्यबाट दिएको राजीनामामा पुनर्विचार गर्न अनुरोध गर्दै अस्विकृत गर्ने निर्णय बैठकले गरेको छ ।
तर, हमालले पार्टीभित्र उठाएको सनातन हिन्दु राष्ट्रको मागलाई जिल्लाको बार्षिक सम्मेलनमा प्रस्तावका रुपमा लैजाने निर्णय गरिएको कार्यबाहक सभापति अधिकारीले बताउनुभयो ।
