नेपालगञ्ज, ११ चैत । आज विश्व क्षयरोग दिवस बाँकेलगायत देशैभरि मनाइएको छ । सरोकारवाला सरकारी तथा गैरसरकारी निकायले विभिन्न सचेतनामूलक कार्यक्रमको आयोजना गरी क्षयरोग दिवस मनाएका हुन् ।
यस वर्ष विश्व क्षयरोग दिवसको नारा ‘हो हामी क्षयरोग अन्त्य गर्न सक्छौँ’ तय गरिएको छ । । विश्व क्षयरोग दिवस हरेक वर्ष मार्च २४ मा मनाउने गरिन्छ ।
दिवसका अवसरमा स्वास्थ्य कार्यालय बाँकेको, नेपालगञ्ज उपमहानगरपालिका र विभिन्न संघ, संस्थाहरूको समन्वयमा नेपालगञ्जमा र्याली निकालिएको थियो । र्यालीमा स्वास्थ्यकर्मी, जनप्रतिनिधि, मानवअधिकारकर्मी, प्रहरी, प्रशासनका पदाधिकारी, पत्रकारलगायत सरोकारवाला निकायका प्रनिनिधिहरुको सहभागिता थियो ।
नेपालगञ्जको भेरी अस्पतालबाट सुरू भएको र्याली नगर परिक्रमापछि विपी चोक अगाडि सभामा परिणत भएको थियो । स्वास्थ्य कार्यालय बाँकेका प्रमुख अंगदबहादुर शाहीको अध्यक्षतामा भएको उक्त सभामा बाँकेमा चालू आर्थिक बर्षको हालसम्म ५३९ जना क्षयरोगी थपिएको तथ्यांक प्रस्तुत गरिएको थियो । तथ्यांक अनुसार, सबैभन्दा बढी ८५ प्रतिशतमा फोक्सोको क्षयरोग देखिने गरेको छ ।
