नेपालगञ्ज, ११ चैत । नेपालगञ्जको पर्यटकियस्थल वाटरपार्कमा मोटरबोट सञ्चालनमा ल्याइएको छ । मोटरबोट सेवा प्रदायक कम्पनी बोटेबोराले रु १ करोड ८ लाखको लागतमा वाटरपार्कमा आप्mनो सेवा विस्तार गरेको हो ।
हालका लागि मोटरबोट सञ्चालन परीक्षणका रुपमा रहेको छ । कम्पनीका सञ्चालक बिष्णु ढकालका अनुसार, व्यवसायिक मोटरबोट सञ्चालनको उद्घाटन बैशाखमा गर्ने तयारी गरिएको छ ।
वाटरपार्कमा मोटरबोट सञ्चालन गरेवापत बोटेबोरा कम्पनीले नेपालगञ्ज उपमहानगरपालिकालाई बार्षिक रु २५ लाख बुझाउनुपर्ने द्धिपक्षिय सम्झौतामा हस्ताक्षर गरिएको छ । यता, कम्पनीले मोटरबोटमा चार किलोमिटर शयर गराएवापत प्रतिव्यक्ति रु २५० शुल्क को व्यवस्था गरेको छ ।
वर्षभरि नै मोटरबोटको सञ्चालन गर्ने उद्देश्यले कम्पनीले वाटरपार्क क्षेत्रमा रहेको पोखरीमा पानीको बोरिङ्ग गरेर मोटरबोट सेवा सञ्चालनमा ल्याएको हो । झण्डै दुई महिना खर्चेर पोखरीलाई मोटरबोट सञ्चालनको लायक बनाइएको सञ्चालक ढकालले बताउनुभयो ।
सञ्चालक ढकालले भन्नुभयो, ‘निकट भविष्यमै पार्कमा जेटस्कि, पाँच वटा पावरस्पोर्ट्स, फ्लोटिङ रेष्टुरेण्ट, अपोजिट बन्जी, साइक्लिङ, जीपलाइन लगायतको सेवा समेत विस्तार गर्ने योजना रहेको छ ।’
चितवनको नारायणघाट र देवघाट तथा सर्लाहीको भरततालमा पर्यटकहरुलाई मोटरबोट सेवा दिँदै आएको कम्पनीले नेपालगञ्जको वाटरपार्क सेवा विस्तारपछि अब सुर्खेतको बुलबुले तालमा छिट्टै मोटरबोट सञ्चालनमा ल्याउने तयारी गरिएको जनाएको छ ।
