नेपालगञ्ज महोत्सवमा उत्साहजनक सहभागिता, सांगितिक कार्यक्रमले दर्शक तान्दै

नेपालगञ्ज ९ चैत्र । नेपालगञ्जको वाटरपार्कमा भइरहेको सातौँ प्रादेशिक औद्योगिक लघु, घरेलु तथा कृषि, व्यापार एवम् पर्यटन महोत्सवमा दर्शकको उत्साहजनक सहभागिता देखिएको छ ।
महोत्सवको चौथो दिन आज शुक्रवार अन्य दिनभन्दा धेरै दर्शकको सहभागिता रहेको थियो । महोत्सवको सांगितिक कार्यक्रममा स्थानीय तथा चर्चित राष्ट्रिय कलाकारलाई महत्वका साथ सहभागि बनाउने आयोजकको रणनीतिस्वरुप नै दर्शकको सहभागिता दिनहुँ बढदै गएको पाइन्छ ।
महोत्सवमा आज शुक्रबार टंक तिमिल्सिना, एमटी महर, सृजना खत्री र करिश्मा ढकाललगायतका कलाकारले आआप्नो बेजोड प्रस्तुती दिएका थिए ।
भोलि शनिबार लोक तथा दोहोरी गायिका टीका पुन, ¥यापर टोङ र डान्सर आरुषी मगरसहित स्थानीय कलाकारको बेजोड प्रस्तुती रहने महोत्सव प्रचारप्रसार संयोजक इन्द्रबहादुर खत्रीले जानकारी दिनुभयो । भोलि शनिवारको सांगितिक कार्यक्रम बिहान १० बजेदेखि सुरु हुने र कार्यक्रमको सञ्चालन तिलक गाउँले तथा रुपाघर्तीमगरले गर्नुहुनेछ ।
दर्शकहरुले महोत्सवको सांगातिक कार्यक्रम कुनै कन्र्सट भन्दा कम नभएको प्रतिक्रिया जनाएका छन् । नेपालगञ्ज१० का प्रकाश शर्माको भनाई छ, ‘डिजे लाइट र अत्याधुनिक साउण्ड सिस्टमले सांगितिक प्रस्तुतीलाई निकै स्तरीय बनाएको छ ।’
मुख्य आकर्षक सांगितिक कार्यक्रमका अलावा महोत्सवमा थारु गाउँ, विभिन्न थरीका झुलाहरुलगायत स्थानीय उत्पादनका राम्राराम्रा वस्तुहरु समेत पाइने गरेको दर्शकहरुले बताएका छन् ।
महोत्सवमा १७५ स्टल रहेका छन् । जसमध्ये व्यवसायिकका ९०, घरेलुका ५०, प्रायोजकका ८, थारु गाउँका १२ र होटल सम्बन्धि १५ स्टल छन् । महोत्सव अवलोकनका लागि टिकटको मूल्य रु १०० राखिएको छ । विद्यार्थीहरुका लागि ५० प्रतिशत छुटको व्यवस्था गरिएको छ ।
नेपाल घरेलु तथा साना उद्योग महासंघ जिल्ला कार्यसमिति (महिला उद्यमी समिति) बाँकेको आयोजना, महासंघ नेपालगन्ज नगरसमितिको सहआयोजक रहेको महोत्सवलाई मुख्य प्रायोजक होटल बाटिका, प्रायोजक नेपाल टेलिकम र संरक्षकमा नेपालगन्ज उपमहानगरपालिका रहेकोछ ।