नेपालगञ्ज ७ चैत्र । नेपालगञ्जको वाटरपार्कमा मङ्गलबारदेखि सुरु भएको सातौँ प्रादेशिक औद्योगिक लघु, घरेलु तथा कृषि, व्यापार एवम् पर्यटन महोत्सवको दोस्रो दिन आज बुधवार ज्योती मगरको प्रस्तुती प्रतिकुल मौसमका कारण प्रभावित बनेको छ ।
आँधीहुरी आएर मौसम प्रतिकुल भएपछि आजको उहाँको प्रस्तुती भोलि बिहीवार हुने भएको छ । त्यसैगरी, अन्य राष्ट्रिय कलाकारको प्रस्तुती पनि भोलिकै लागि सारिएको छ । केहिबेरको आँधीहुरीपछि ज्योति मगर र अन्य राष्ट्रिय कलाकारको प्रस्तुती भोलिका लागि सारिएपछि आज बुधबार स्थानीय कलाकारले आफ्नो प्रस्तु्तीमार्फत दर्शकलाई मनोरंजन दिएका थिए ।
आयोजकका अनुसार, भोलि बिहीबार विहान ११ बजेदेखि स्थानीय कलाकार र दिउँसो २ बजेपछि राष्ट्रिय कलाकारको प्रस्तुती रहनेछ । ज्योती मगरका साथ तेस्रो कमल विसी ‘माल्दाई’ र सपना शाहीको प्रस्तुती रहनेछ भने पुरुषोत्तम सापकोटा र रुपा घर्तीमगरको जोडीले कार्यक्रम सञ्चालन गर्नेछन् ।
चैत १८ गतेसम्म सञ्चालन हुने महोत्सवका समयमा होली पर्ने भएकाले चैत १२ गते होली उत्सव कार्यक्रम राखिएको छ । होली उत्सवका दिन नेपाली सिने जगतका ख्याती प्राप्त कलाकार पल शाहलाई आमन्त्रण गरिएको छ ।
तराई क्षेत्रमा गर्मी बढ्न थालेको अवस्थालाई ध्यानमा राखेर महोत्सव साँझ ८ बजेसम्म सञ्चालन हुने जनाइएको छ । महोत्सवमा रु दुई करोड बढीको कारोबार तथा दुई लाख बढी दर्शक अवलोकन गर्न आउने अपेक्षा गरिएको छ ।
नेपाल घरेलु तथा साना उद्योग महासंघ जिल्ला कार्यसमिति (महिला उद्यमी समिति) बाँकेको आयोजना, महासंघ नेपालगञ्ज नगर समिति सहआयोजक रहेको प्रादेशिक महोत्सवको मुख्य प्रायोजक होटल बाटिका, प्रायोजक नेपाल टेलिकम र संरक्षकमा नेपालगञ्ज उपमहानगरपालिका रहेको छ ।
प्रादेशिक महोत्सव आयोजक महासंघ, बाँकेका अध्यक्ष मधुकुमारी खड्काका अनुसार महोत्सवमा १७५ स्टल बुक भइसकेका छन् । जसमध्ये व्यवसायिकका ९०, घरेलुका ५०, प्रायोजकका ८, थारु गाउँका १२ र होटल सम्बन्धि १५ स्टल रहेका छन् । महोत्सव अवलोकनका लागि टिकटको मूल्य रु १०० राखिएको छ । विद्यार्थीहरुका लागि ५० प्रतिशत छुटको व्यवस्था गरिएको छ ।
