नेपालगञ्ज, ६ चैत । समुदायस्तरवाटै फुटबल खेल्न सिकाउन नेपालगञ्जमा ‘एन्फा कम्युनिटी कोचिङ्ग कोर्स’ प्रशिक्षण सुरु गरिएको छ ।
बाँके जिल्ला फुटबल संघले आज मंगलवार आयोजना गरेको चार दिने उक्त प्रशिक्षणमा बाँके, बर्दिया, दाङ्ग, सुर्खेत, कालिकोट, काठमार्डौ, कैलाली र कञ्चनपुर जिल्लाका ४३ फुटबल खेलाडीको सहभागिता रहेको छ ।
कार्यक्रमका प्रमुख अतिथि नेपालगञ्जका मेयर प्रशान्त विष्टले प्रशिक्षकद्धय राष्ट्रिय फुटबल टीमका पूर्व कप्तान एवम् एन्फाका कार्यवाहक प्राविधिक निर्देशक हरि खड्का र एन्फा हेड अफकोच एजुकेशन सञ्जीव सिंहलाई फुटबल हस्तान्तरण गर्दै प्रशिक्षणको उद्धाटन गर्नुभएको थियो ।
त्यस अवसरमा मेयर विष्टले पालिकास्तरवाटै फुटबललगायतका खेलकूद गतिविधिलाई बढावा दिनुपर्ने बताउदै त्यसमा केन्द्रीय, प्रदेश र जिल्लाका खेलकुद सम्बद्ध निकायले आधिकारिकरुपमै समन्वयकारी भूमिका निर्वाह गर्नुपर्छ भन्नुभयो ।
साविक मध्यपश्चिम खेलकुद विकास समिति लुम्बिनी प्रदेश नेपालगञ्जका कार्यालय प्रमुख महेश चन्दले यस क्षेत्रमा फुटबलको विकासमा सबै जिम्मेवार पक्षको साँझा भूमिका हुनुपर्ने धारणा राख्नुभयो ।
बाँँके जिल्ला फुटबल संघका अध्यक्ष एवम् एन्फाका केन्द्रीय सदस्य भोजराज शाहीको अध्यक्षता र महासचिव कमल खत्रीले सञ्चालन गर्नुभएको प्रशिक्षण उद्धाटन कार्यक्रममा बाँके जिल्ला खेलकुद विकास समितिका अध्यक्ष संदिप शाह, एन्फाका पूर्व केन्द्रीय सदस्य गोवर्धनसिंह सम्झनालगायतले बोल्नुभएको थियो ।
