नेपालगञ्ज ४ चैत्र । नेपालगञ्जको वाटरपार्कमा हुने सातौँ प्रादेशिक औद्योगिक लघु, घरेलु तथा कृषि, व्यापार एवम् पर्यटन महोत्सवको तयारी अन्तिम चरणमा पुगेको छ । महोत्सव यही चैत ६ देखि १८ गतेसम्म हुँदैछ ।
महोत्सव नेपाल घरेलु तथा साना उद्योग महासंघ बाँकेले आयोजना गर्न लागेको हो । महोत्सव सञ्चालनको ८० प्रतिशत काम पूरा भइसकेको जनाइएको छ । महोत्सव मूल आयोजक समितिका अनुसार महोत्सवमा सहभागि हुने कलाकारको टुंगो लागिसकेको छ भने आइतवारसम्म २०० बढी स्टल बुक भइसकेको छ ।
लुम्बिनी प्रदेशको आर्थिक गतिविधिलाई चलायमान तथा उद्यमीहरुले उत्पादन गरेको वस्तुहरुको बजारीकरण, उत्पादन तथा उद्यमीहरुको प्रर्वद्धनका लागि महोत्सव आयोजना गरिएको महासंघ, बाँके अध्यक्ष मधु खड्काले बताउनुभयो ।
तराई क्षेत्रमा गर्मी बढ्न थालेकोले अवलोकनकर्तालाई ध्यानमा राखेर महोत्सव साँझ ८ बजेसम्म सञ्चालन हुने जनाइएको छ । महोत्सवमा रु दुई करोड बढीको कारोबार तथा दुई लाख बढी दर्शक अवलोकन गर्न आउने अपेक्षा गरिएको छ ।
