नेपालगञ्ज, २ चैत । उद्योग बाणिज्य तथा आपूर्ति मन्त्री दामोदर भण्डारीले आमउपभोक्ताको अधिकारसंग खेलवाड गर्ने छुट कसैलाई नभएको बताउनुभएको छ ।
विश्व उपभोक्ता अधिकार दिवसका अवसरमा बाणिज्य आपूर्ति तथा उपभोक्ता संरक्षण कार्यालयले आज शुक्रवार नेपालगञ्जमा आयोजना गरेको अन्तरक्रियामा मन्त्री भण्डारीले उपभोक्ताहरुको अधिकारसंग खेलवाड गर्नेलाई कडाभन्दा कडा कारवाही गर्न सरकार तत्पर रहेको चेतावनी समेत दिनुभयो ।
मन्त्री भण्डारीले व्यापारीहरुका अधिकार पनि उपभोक्ता अधिकारसंगै गाँसिएकाले व्यापारीहरु उपभोक्तामैत्री हुनुपर्नेमा जोड दिनुभयो ।
बाँकेका प्रमुख जिल्ला अधिकारी श्रवणकुमार पोखरेलको अध्यक्षतामा भएको कार्यक्रममा सहभागि सरोकारवाला निकायका पदाधिकारी, प्रतिनिधिहरुले बजार अनुगमनका सरकार कसिलो हुनुपर्ने सुझाव दिएका थिए ।
यसैबीच, उद्योग बाणिज्य तथा आपूर्ति मन्त्री भण्डारी नेपालगञ्जमा आजै भएको डल्फिन गु्रपको १४औं बार्षिकोत्सव कार्यक्रममा सहभागि हुनुभयो । कार्यक्रममा मन्त्री भण्डारीले वर्तमान सरकार जनहित र देशहितको दिशामा अघि बढिरहेको दावी गर्नुभयो ।
कार्यक्रममा नेपालगन्ज उद्योग बाणिज्य संघका अध्यक्ष टंकबहादुर धामी, डल्फिन अध्यक्ष सूर्यबहादुर थापा लगायतले बोल्नुभएको थियो ।
