नेपालगञ्ज, १ चैत । नेपाल प्रेस युनियन बाँकेका कार्यसमिति सदस्य तथा जी नेपाल फोर के टेभिजिजनका पत्रकार अभिषेक गुप्तामाथि भेरी अस्पताल नेपालगन्जका सुरक्षागार्डले दुर्व्यवहार गरेका छन् । उक्त घटनाको नेपाल प्रेस युनियन बाँके शाखाले आफ्नो गम्भीर ध्यानाकर्षण भएको जनाएको छ ।
समाचार संकलनका लागि आज बिहीवार दिउँसो पत्रकार गुप्ताले अस्पतालको फुटेजहरु खिच्ने क्रममा सुरक्षागार्डद्वारा क्यामेरा खोस्ने काम गरिएको थियो । आफूले पत्रकार हो भनेर परिचय दिँदा समेत सुरक्षागार्डले यस्ता पत्रकार धेरैलाई चिनेको छु भन्दै अनुमति वेगर फुटेज नलिन धम्की दिएको पनि पत्रकार गुप्ताले बताउनुभयो ।
युनियनका सचिव भीष्म लोधद्वारा आज शुक्रवार जारी विज्ञप्तीमा पत्रकार गुप्तामाथि दुर्व्यवहार गर्ने सुरक्षागार्डमाथि अस्पताल प्रशासनले छानविन गरी कारवाही गर्न समेत माग गरिएको छ ।
विज्ञप्तीमा भनिएको छ, “अस्पतालको आइसीयु, प्रयोगशालास्थल जस्तो संवेदनशील ठाउँमा समाचार संकलन गर्दा स्वभाविकरुपमा पत्रकारहरु संवेदनशील हुनैपर्छ । तर, अस्पताल बाहिरको दृष्य खिच्नमा समेत रोक लगाउँदै पत्रकारमाथि दुर्व्यवहार गरिनु दुःखद कुरा हो ।“
यस्ता घटना दोहोरिन नदिन र पत्रकारहरुलाई निर्वाध समाचार संकलन गर्न दिने वातावरण बनाउन युनियनले अस्पताल प्रशासनको ध्यानाकर्षण समेत गराएको छ ।
