नेपालगञ्ज, २२ फागुन । प्रेस सेन्टर नेपालको लुम्बिनी प्रदेशस्तरीय ‘मिडिया सम्मेलन’ आजवाट बाँकेको कोहलपुरमा भएको छ । दुई दिनसम्म चल्ने सम्मेलनमा लुम्बिनी प्रदेश अन्तर्गत १२ जिल्लाका २०० बढी पत्रकारहरु सहभागि छन् ।
सम्मेलनको नेकपा (माओवादी केन्द्र) का उपाध्यक्ष तथा पूर्व सभामुख अग्निप्रसाद सापकोटाले गठबन्धन परिवर्तन रहर नभए बाध्यता भएको बताउनुभयो ।
नेपाली काँग्रेसबाट संविधान, धर्म निरपेक्षता र गणतन्त्रमाथि खतरा उत्पन्न भएपछि अर्को गठबन्धनको बाध्यता आएको उपाध्यक्ष सापकोटाको तर्क छ ।
उहाँले अहिलेको गठबन्धन प्रगतिशील भएको बताउदै अब बृहत् वामपन्थी एकताबाट शक्तिशाली कम्युनिष्ट पार्टी गठन हुन्छ भन्नुभयो ।
नेपाल पत्रकार महासङ्घका अध्यक्ष विपुल पोखरेलले नेपाली पत्रकारको पेसागत सुरक्षा र जीविकोपार्जन महत्पूर्ण विषय भएको बताउदै नयाँ मिडिया हाउसले गर्दा परम्परागत मिडियाहरु बन्द हुन थालेकाले पत्रकारहरू अहिले सङ्कटमा परेका छन् भन्नुभयो ।
प्रेस सेन्टर नेपालका अध्यक्ष विष्णुप्रसाद सापकोटा ‘जुगल’ ले अहिले नेपाली मिडिया एक चुनौतीपूर्ण अवस्थाबाट गुज्रिरहेकाले सबैले सचेत भएर अगाडि बढ्नुपर्ने बताउनुभयो ।
सम्मेलन उद्धाटन समारोहमा माओवादी केन्द्रका स्थायी समिति सदस्य महेश्वर गहतराज, माओवादी केन्द्र लुम्बिनी प्रदेशका अध्यक्ष सुदर्शन बराल, सचिव कृष्ण अधिकारी, प्रेस सेन्टर नेपालका उपाध्यक्षहरू निर्मल ज्ञवाली, अजयदिप शर्मा, महासचिव सन्तोष पौडेल, सल्लाहकार खिलबहादुर कार्की, प्रेस सेन्टर लुम्बिनी प्रदेशका अध्यक्ष मानसिंह बिक लगायतका वक्ताहरुले पनि बोल्नुभएको थियो ।
सम्मेलनको बन्द सत्रमा श्रमजिवी पत्रकारको पारिश्रमिक, नेपाली पत्रकारिताको व्यवसायिक व्यवस्थापन, अग्रज पत्रकारहरुको सम्मान तथा नयाँ पत्रकारहरुका वृत्तिविकास कार्यक्रम, विज्ञापन नीतिमा सुधार, मिडियाको स्थानीयकरण, मिडियाको संरचनागत सुधारका योजना, पत्रकारका आस्थागत संगठनको मर्यादित व्यवस्थापनलगायत मुलुकका समसायिक राजनीतिक, आर्थिक सांस्कृतिक तथा सामाजिक विषयका एजेण्डाहरुमाथि छलफलका हुने सेन्टरका केन्द्रीय सचिव सिराज खानले जानकारी दिनुभयो ।
