नेपालगञ्ज, २५ फागुन । ११४औ अन्तर्राष्ट्रिय महिला दिवस बाँकेको नरैनापुर पनि आज शुक्रवार धुमधामका साथ मनाइएको छ ।
बी ग्रुपको सहकार्यमा नरैनापुर गाँउपालिकाको महिला तथा बालबालिका शाखाले आयोजना गरेको कार्यक्रममा पालिका उपाध्यक्ष जयन्तीदेवी श्रीवास्तवले मुलुकको राजनीतिक तथा सामाजिक परिवर्तनमा महिलाको भूमिका सधै अग्रणी रहने गरेको छ भन्नुभयो । उनीहरुको यस्तो योगदानलाई विर्सन नहुनेमा उपाध्यक्ष श्रीवास्तवले जोड दिनुभयो ।
महिला तथा बालबालिका शाखा प्रमुख कृष्णा चन्दले यस वर्षको महिला दिवसको नारा ‘महिलामा लगानी, सभ्य र समुन्नत समाजको थालनी’ भन्ने रहेकाले सबैखाले प्रक्रियामा महिलाको सहभागिता बढाउदै लानुपर्छ भन्नुभयो ।
उहाँले नरैनापुरमा पछिल्लो समयमा आत्महत्या तथा दाइजोका कारण महिलालाई यातना दिने जस्ता घटना बढदै गएको प्रतिचिन्ता व्यक्त गर्दै उक्त घटनाहरुलाई नियन्त्रण गर्नेतर्प सम्बद्द पक्ष तत्काल एक्सनमा आउनुपर्नेमा जोड दिनुभयो ।
कार्यक्रममा ईलाका प्रहरी कार्यालय भगवानपुरका प्रमुख राजन रायमाझी, नरैनापुर वडा नं. २ अध्यक्ष मसूदअहमद शाह, सशस्त्र प्रहरी निरीक्षक छवी कुँवर, कार्यपालिका सदस्य सन्तोष श्रीवास्तव, प्रेस विज्ञ आलम खानलगायतका वक्ताहरुले पनि बोल्नुभएको थियो ।
यसअघि महिलाको वकालत गर्ने पक्षका निकाय तथा सरोकारवाला संघ संस्थाका प्रतिनिधि सहभागि जुलुसले नरैनापुर क्षेत्रको परिक्रमा गरेको थियो । जुलुसमा झण्डै २०० बढीको सहभागिता थियो ।
