नेपालगञ्ज, १२ फागुन । बाँकेका बालबालिकालाई भोलि फागुन १३ गतेदेखि ३० गतेसम्म दादुरा—रुबेलाविरुद्धको खोप लगाइँदैछ । स्वास्थ्य कार्यालय बाँकेका सूचना अधिकारी नरेशबाबु श्रेष्ठका अनुसार, १ लाख ६५ हजार ५५६ बालबालिकालाई खोप लगाउने लक्ष्य निर्धारण गरिएको छ । ‘हामी ९ महिनादेखि १५ वर्ष उमेर समूहका बालबालिकालाई खोप लगाउछौ’—श्रेष्ठले भन्नुभयो । खोप लगाइने कुल संख्या मध्ये ९ महिनादेखि ५ वर्ष मुनिका ४८ हजार ८०१ जना र ५ वर्षदेखि १५ वर्षमुनिका १ लाख १६ हजार ७६५ जना बालबालिकालाई रहेका छन् ।
जिल्लामा खोप लगाइने कुल संख्या मध्ये नेपालगञ्ज उपमहानगरपालिकामा ४२ हजार २७०, कोहलपुर नगरपालिकामा २५ हजार ७१३, राप्तीसोनारी गाउँपालिकामा १८ हजार ६६१, जानकी गाउँपालिकामा १८ हजार १४९, डुडुवा गाउँपालिकामा १३ हजार ७५५, बैजनाथ गाउँपालिकामा १९ हजार २२३ र नरैनापुर गाउँपालिकामा १३ हजार ७७६ बालबालिकालाई खोप लगाउने लक्ष्य निर्धारण गरिएको छ ।
खोप लगाउन जिल्लाभरि १ हजार २९६ जना स्वास्थ्यकर्मी र १ हजार २७३ जना महिला स्वास्थ्य स्वयंसेविका परिचालन गरिएको छ ।
भोलि बिहान १० बजे नेपालगञ्ज वडा नं. ४ सल्यानीबागस्थित कन्या माध्यमिक विद्यालयमा राखिएको खोप केन्द्रवाट अभियानको बाँके जिल्ला समन्वय समितिका प्रमुख ज्ञानेन्द्रकुमार चौधरीले शुभारम्भ गनुृहुनेछ ।
