नेपालगञ्ज, १० फागुन । ट्राफिक प्रहरीद्धारा नै बिहीवार बिहान दुई घण्टा धम्बोझी क्षेत्रको सुर्खेत रोड जाम गरेर ट्राफिक सप्ताहको शुभारम्भ गरिएको छ । एकातिर ट्राफिक सप्ताहको तामझाम थियो भने अर्कोतर्प जाममा परेका सवारी साधनको चर्को हर्नले धम्बोझी क्षेत्रको ट्राफिक अवस्था अस्तव्यस्त बनाएको थियो ।
यस्तै अवस्थाका बीच उपप्रधान तथा गृहमन्त्री नारायणकाजी श्रेष्ठले ट्राफिक सप्ताहको उद्घाटन गर्नुभयो । उक्त अवसरमा गृहमन्त्री श्रेष्ठले स्कुटर चालकलाई हेल्मेट हस्तान्तरण तथा सवारी साधनमा सचेतनामूलक स्टिकर टाँस गर्नुभएको थियो ।
कार्यक्रममा गृहमन्त्री श्रेष्ठले भन्नुभयो, ‘ट्राफिक सचेतना अभिबृद्धि गर्दै सडक अनुशासन कायम गर्नु सबैको जिम्मेवारीको हो ।’ उहाँको यो अभिव्यक्ति सुन्नेहरु सडक छेउतिर जामको सकसमा परेका नागरिक पनि थिए ।
सडक छेउमा तयार गरिएको मञ्चको कार्यक्रमअघि प्रभातफेरि जुलुस निकालिएको थियो । प्रभातफेरीमा सेना, प्रहरी, स्थानीय प्रशासनका पदाधिकारी, नागरिक समाजका अगुवा तथा विद्यार्थीवर्गको सहभागिता रहेको थियो ।
बाँके जिल्ला ट्राफिक प्रमुख गोपीकृष्ण सुवेदीका अनुसार, नेपालगञ्ज उपमहानगरपालिका, कोहलपुर नगरपालिका र जिल्ला ट्राफिक प्रहरी कार्यालय बाँकेको आयोजनामा ट्राफिक सप्ताह शुभारम्भ गरिएको हो ।
