‘दृष्टिबिहीनप्रति राज्यपक्ष थप जिम्मेवार बन्नुपर्छ’

नेपालगञ्ज, ९ फागुन । नेपालगञ्जस्थित मंगलप्रसाद माध्यमिक विद्यालयमा ४० बढी दृष्टिबिहिन र न्यूनदृष्टियुक्त बालबालिका र किशोरकिशोरीहरु अध्ययनरत छन् ।
विद्यालयमा एकदेखि १२ कक्षासम्म अध्ययनरत दृष्टिबिहिन र न्यूनदृष्टियुक्त विद्यार्थीहरुको संस्थागत अभिभावकत्वको जिम्मेवारी बाँके नेत्रहिन संघले लिएको छ । संघले ति विद्यार्थीहरुलाई शिक्षा, सीपविकास तालिम र रोजगारी दिलाउने र उनीहरुको अधिकार स्थापित गराउन महत्वपूर्ण भूमिका खेल्दै आएको छ ।
संघका सदस्य समेत रहनु भएका सोही विद्यालयका दृष्टिबिहिन शिक्षक भोला त्रिपाठी भन्नुहुन्छ—‘संघले विभिन्न निकायसंगको सहकार्यमा दृष्टिबिहिन र न्यूनदृष्टियुक्तहरुको जीवनलाई सहज र सरल बनाउने प्रयास गर्दै आएको छ ।’ विद्यालयमा अध्ययनरत दृष्टिबिहिन र न्यूनदृष्टियुक्तहरुको अध्ययन निशुल्क हुने गरेको छ । त्यसको चाँजोपाँजो नेपालगञ्ज उपमहानगरपालिकाको शिक्षा शाखाले मिलाएको छ । शिक्षा शाखाले प्रत्येक विद्यार्थीका लागि मासिक रु चार हजार रकम उपलव्ध गराउदै आएको छ । ‘न्युनदृष्टिबिहिन र न्युनदृष्टियुक्त विद्यार्थीहरुका लागि निशुल्क शिक्षादिक्षा, सीपमूलक तालिम एवम् रोजगारीमा आरक्षणको व्यवस्थाले पनि उनीहरुको जीवन सहज ढंगवाट अगाडी बढाउन अवसर मिलेको छ’—शिक्षा शाखा प्रमुख गोर्खबहादुर थापाको भनाई छ ।
मंगल माविमा दृष्टिबिहिन र न्यूनदृष्टियुक्तका लागि अलग अध्यापन गराइदैन, आँखा देख्नेहरुसंग राखेर पढाउने गरिएको छ । ‘यसो गर्नुको मुख्य उद्देश्य हामी सबै एउटै हौ भन्ने भावनाको विकास गराउनु नै हो’—शिक्षक त्रिपाठीले भन्नुभयो ।
संघको तथ्यांक अनुसार, बाँकेमा झण्डै पाँच हजार अपाङ्गता भएका मध्ये दृष्टिबिहिन र न्यूनदृष्टियुक्तहरुको संख्या झण्डै २०० रहेको छ । शिक्षक त्रिपाठी भन्नुहुन्छ,‘दृष्टिबिहिनका लागि अहिले जति सुखद प्रयास भएका छन्, यो नै पर्याप्त छैन । यसका लागि राज्य थप जिम्मेवार हुनैपर्छ ।’
सुखदुःखमाा एकअर्काको सहयात्री बन्नु, आपसी भाइचारा बलियो बनाइ राख्नु, सहयोगी भावना, जस्तोसुकै काम पनि गर्न सक्छु भन्ने आँट, संकल्प, सिर्जनशीलता, साहित्य र विभिन्न कलामा पोख्त हुनु, कामप्रतिको एकाग्रता यी सबै कारणले पनि समाजमा दृष्टिबिहिन र न्यूनदृष्टियुक्तहरुको उचाई बढदै गएको छ भन्दा अतियुक्ति नहोला । आवश्यकता यति मात्र हो, हामी सपाङ्गता भएकाहरु उनीहरुप्रति सधै सकारात्मक भइदिनुपर्छ, उनीहरुको सहयोगी बनिदिनुपर्छ ।