नेपालगञ्ज, २६ माघ । बाँकेको डुडुवा गाउँपालिकाको १५औँ गाउँसभा बैठक आज सकिएको छ । गाउँसभा बैठकले चालु आर्थिक वर्ष २०८०—०८१ का केहि कार्यक्रम तथा योजनालाई संशोधन गरेको छ । बैठकमा अध्यक्ष नरेन्द्रकुमार चौधरीले प्रस्तुत गर्नुभएको संशोधित कार्यक्रम तथा योजनासहितको प्रस्ताव बैठकले सर्वसम्मत पारित गरेको छ । यसैगरी, अध्यक्ष चौधरीले आर्थिक वर्ष २०८०÷०८१ को साउनदेखि पुस मसान्तसम्मको प्रगतिविवरण प्रस्तुत गर्नुभएको थियो ।
प्रगति विवरण अनुसार, घर–घरमा स्वास्थ्य कार्यक्रम, बर्थिंङ्ग सेन्टर सेवा, सबै वडा कार्यालय, स्वास्थ्यचौकी र माध्यमिक विद्यालयमा इन्टरनेट सहित इन्टरकम र सीसी क्यामरा जडान तथा डिजिटल प्रणाली मार्फत कार्य सम्पादन, कृषकहरुलाई किट तथा ढुसीनाशक बिषादी निःशुल्क वितरण र कृषि विकास शाखामा ११ व्यवसायिक कृषकको समूह दर्ता गरिएको छ ।
यस्तै, गाउँपालिकाबाट संचालित बहुबार्षिय आयोजना अन्तर्गत डुडुवा–६ मा निर्माणधिन शीत भण्डारको भौतिक प्रगति ५५ प्रतिशत भएको, घर–घर पशु स्वास्थ्य कार्यक्रम, गाउँपालिकाको पशु सेवा स्वास्थ्य शाखाबाट गाई÷भैसीमा उन्नत जातको कृत्रिम गर्भाधान कार्यक्रमलाई प्रगति विवरणमा समेटिएको छ ।
यसैगरी, कृषकहरुको करिब ८८ पशुपन्छीमा रेबिज बिरुद्ध खोप, पशु महामारी रोगको उपचार, बालविकास, मदरसा,
गुरुकुल तथा विद्यालयको सुधार कार्यक्रममा उल्लेख्य प्रगति भएको देखाइएको छ ।
यसका अलावा सडक, शिक्षा, संचार विकासमा समेत ६ महिनाभित्र सन्तोषजनक प्रगति भएको जनाइएको छ ।
गाउँसभा बैठक समापनका अवसरमा अध्यक्ष चौधरीले विशेष रणनीति र कार्ययोजनाका साथ पालिकाको कार्यक्रम अघि बढिरहेको बताउदै स्वास्थ्य, शिक्षा, कृषि, पशुलगायतका क्षेत्रमा उल्लेख्य काम भएको दावी गर्नुभयो ।
एउटा लक्ष्य र उद्देश्यअनुरुप काम भइरहेको अवस्थामा विपक्षी दलहरुले बेलाबेला अवरोध सिर्जना गरिरहेको भन्दै अध्यक्ष चौधरीले भन्नुभयो,–‘राम्रो काम गर्नेलाई दुनियाको कुनै तागतले रोक्न सक्दैन ।’
सभामा १९ जना सदस्यहरुको सहभागिता रहेको थियो । स्थानीय सरकार सञ्चालन ऐन २०७४ अनुसार बहुमतको आधारमा बैठकको कोरम पुगेर सभा बसेको गाउँपालिका प्रमुख प्रशासकिय अधिकृत सदस्यसचिव गिरबहादुर सेजुवालले बताउनुभयो ।
सभामा गाउँपालिकाका उपाध्यक्ष शाहिदा बानो, वडा अध्यक्षहरु पटेश्वर कुर्मी, दुर्गाप्रसाद बर्मा, आमोद तिवारी, सगिर खाँ लगायत सदस्यहरुको सहभागिता रहेको थियो । यसअघि माघ ४ गते डाकिएको गाउँसभामा कोरम नपुगेर स्थागित भएको थियो ।
