नेपालगञ्ज, २० पुस । लायन्सका संस्थापक मेल्बिन जोन्सको १४५औं जन्मोत्सव बाँके र बर्दियामा सप्ताहव्यापी कार्यक्रम गरी मनाइदैछ ।
लायन्स क्लव इन्टरनेशनल डिस्ट्रिक्ट ३२५ एन अन्तर्गत एरिया नं. ४ को लायन्स क्लबहरुको संयुक्त आयोजनामा बाँके र बर्दियामा पुस २२ गतेदेखि सेवामुखी कार्यक्रम गर्न लागिएको हो ।
आज नेपालगञ्जमा गरिएको पत्रकार भेटघाटमा कार्यक्रम संयोजक लायन सरिता शाक्यले पुस २८ गतेसम्म संचालन हुने कार्यक्रममा स्वास्थ्यका विषय धेरै समेटिएका छन् भन्नुभयो ।
उहाँका अनुसार, जन्मोत्सवमा महिला क्यान्सर सम्बन्धि परीक्षण, न्यानो कपडा वितरण, आँखा, कान, घाँटी, मधुमेह, दन्त र एचआइभी सम्बन्धि स्वास्थ्य शिविर संचालन, खाद्यान्न, शैक्षिक तथा सर्जिकल सामग्री र औषधि वितरण, सरसफाई, रक्तदान, वृक्षारोपण, फेलोसिप लगायतका तय गरिएका छन् ।
पत्रकार सम्मेलनमा लायन्स क्लव इन्टरनेशनल डिस्ट्रिक्ट गभर्नर मुकुल ढकाल, पूर्व डिस्ट्रिक्ट गभर्नर मधुसुदन रिजाल, सेम शाक्य र डिस्ट्रिक सेक्रेटरी उमा थापामगर, नेपालगञ्ज उद्योग बाणिज्य संघका पूर्व अध्यक्ष कृष्णप्रसाद श्रेष्ठलगायतको उपस्थिति रहेको थियो ।
