नेपालगञ्ज, ११ पुस । नेपालगञ्जमा महिला उद्यमको आठौं लुम्बिनी प्रदेशस्तरीय प्रदर्शनी हुने भएको छ । महिला उद्यमीको उत्पादनलाई बजारीकरण र प्रोत्साहन गर्ने र नवउद्यमीलाई उत्प्रेरणा दिने उद्देश्यले प्रदर्शनी आयोजना गर्न लागिएको हो ।
‘प्रदर्शनी आयोजनाका लागि विभिन्न निजी क्षेत्रका व्यापारिक प्रतिष्ठान र संघ संस्थाले सहयोग गर्ने प्रतिवद्धता जनाएका छन् ।’ आयोजक संस्था महिला उद्यमी संघ बाँकेका अध्यक्ष सावित्रा बस्नेतले भनाइ छ । बस्नेतका अनुसार, प्रदर्शनी पुस २४ देखि २८ गतेसम्म हुनेछ ।
प्रदर्शनी तयारीका सन्दर्भमा आज नेपालगञ्जमा आयोजना गरिएको पत्रकार सम्मेलनमा प्रदर्शनीमा ६० बढी महिला उद्यमीहरुको स्टल राखिने जानकारी दिइएको छ । प्रदर्शनी आयोजनाका लागि करिब १० लाख खर्च हुने र करिब ८ हजार दर्शकले अवलोकन गर्ने अनुमान गरिएको छ । नेपालगन्ज उपमहानगरपालिका वडा नम्बर २ स्थित बागेश्वरी मन्दिर परिसरको चिल्ड्रेन पार्कमा ५ दिनसम्म चल्ने प्रदर्शनीमा लुम्बिनी प्रदेशका १२ जिल्लाका साथै सदुरपश्चिम र कर्णाली क्षेत्रका केहि महिला उद्यमीको समेत सहभागिता रहनेछ ।
प्रदर्शनीका स्टलमध्ये बाँकेबाट सहभागि भएका मध्येबाट एक जना र अन्य बाहिरी जिल्लाबाट सहभागि भएका एक जना उद्यमीलाई पुरस्कृत गरिनेछ ।
महिला उद्यमीको समस्या र चुनौतिको बारेमा सरोकारवालासँग अन्तरक्रिया र हरेक दिन सफल महिला उद्यमीहरुको अनुभव र संघर्षको कुरा सुनाउने कार्यक्रम समेत रहेको अध्यक्ष बस्नेतले बताउनुभयो । उहाँका अनुसार, नेपालगन्ज उपमहानगरपालिकाको आर्थिक सहयोगमा हुन लागेको यो प्रदर्शनीले महिलाहरुलाई उद्यमतर्फ आर्कषित गराउँदै राज्यको आर्थिक विकासमा योगदान गर्ने अपेक्षा गरिएको छ ।
