नेपालगञ्ज, २१ मंसिर । नेपालगञ्जको अव्वल कहलिएको सोफिया इङ्गलिस स्कुलले आज आफ्नो १७औं बार्षिकोत्सव भव्यताका साथ मनाएको छ । सोही समारोहमा स्कुलले क्रिस्मसडे सेलिब्रेशन समेत गरेको थियो ।
स्कुलका अध्यक्ष केबी बसेलको अध्यक्षतामा भएको बार्षिकोत्सव तथा क्रिस्मसडे कार्यक्रममा स्कुलका प्रिन्सिपल सुशीला बसेल, शिक्षा कार्यालय बाँकेका अधिकृत उत्तम श्रेष्ठ, नेपालगञ्जका उपमेयर कमरुद्धिन राई र नेपालगञ्ज उद्योग बाणिज्य संघका पूर्व अध्यक्ष अब्दुलवाहिद मन्सुरीको विशेष उपस्थिति रहेको थियो । यसैगरी, कार्यक्रममा ठूलो संख्यामा अभिभावकहरु, विद्यार्थीलगायतको समेत सहभागिता रहेको थियो ।
राष्ट्रिय गानवाट शुरु भएको बार्षिकोत्सव तथा क्रिस्मसडे सेलिब्रेशनमा सन्तानले आमाबुवाप्रति गर्नुपर्ने व्यवहारका विषयमा छात्रछात्राद्धारा हृयदस्पर्शी नाटक प्रदर्शन गरेका थिए । नाटक हेरेपछि धेरैका आँखा रसाएका थिए । यसैगरी, छात्रछात्राको सांगितिक प्रस्तुतीका साथै पिटी प्रदर्शन र पुरस्कार वितरणले कार्यक्रमलाई थप रोचक बनाएको थियो ।
सेलिब्रेशनका लागि स्कुल परिसरलाई ध्वजापताकाले सजाएर आकर्षक बनाइएको थियो ।
