नेपालगञ्जमा पूर्ण खोप लगाउन छुटेका बालबालिकालाई घरघरमा खोप लगाइदै

नेपालगञ्ज, २३ चैत । नेपालगञ्ज उपमहानगरपालिकाले पूर्ण खोप लगाउन छुटेका बालबालिकालाई घरघरमा पुगेर खोप लगाउन थालेका छ । त्यसका लागि १६ महिनादेखि ५९ महिनासम्मका खोप लगाउन छुटेका बालबालिकाको घरघरमा गएर खोजी कार्य शुरु गरिएको नेपालगञ्ज उपमहानगरपालिका जनस्वास्थ्य निरीक्षक जागेश्वर बस्नेतले जानकारी दिनुभयो । आगामी बैशाखमा पूर्ण खोप सुनिश्चितता तथा दिगोपना घोषणाका लागि खोप लगाउन छुटेका बालबालिकालाई घरघरमा पुगेर खोज्न थालिएको हो ।
नेपालगञ्ज उपमहानगरपालिकाका २३ वटै वडामा स्वास्थ्यकर्मी र महिला स्वास्थ्य स्वयंसेविका परिचालन गरेर ‘खोज र खोप’ अभियान सञ्चालन गरिएको जनस्वास्थ्य निरीक्षक बस्नेतले बताउनुभयो ।
‘खोज र खोप अभियानलाई प्रभावकारी बनाउन वडावडामा कार्यशाला गोष्ठी सकेर पूर्ण खोप सुनिश्चितता र दिगोपनामा निरन्तरताका लागि कार्ययोजना तयार गरेका छौ’—बस्नेतले भन्नुभयो ।
सोही कार्ययोजना बमोजिम स्वास्थ्यकर्मी र महिला स्वास्थ्य स्वयंसेविकालाई वडावडामा खटाइएको छ भने चैत मसान्तसम्म खोप नलगाएका बालबालिकाको लाइन लिष्टिङ गरेर खोप लगाइने जनाइएको छ । ।