नेपालगञ्ज, २० चैत । बाँकेको डुडुवा गाउँपालिकामा बार्षिक सरदर एक हजार महिलाहरु संस्थागत सुत्केरी हुने गरेका छन् । डुडुवा गाउँपालिकाको कार्यालयका स्वास्थ्य शाखा सहसंयोजक वीरेन्द्रबहादुर घलेका अनुसार, संस्थागत सुत्केरीका लागि पालिकाको कम्दी, बनकट्टी, बेतहनी र हिरमिनिया गरि ४ स्थानमा प्रभावकारी प्रसुती केन्द्रहरु संचालनमा ल्याइएको छ । मातृ मत्युदर तथा नवजात शिशु मृत्युदर घटाउन गाउँपालिकाको कार्यालयले संस्थागत सुत्केरीका लागि विशेष रणनीति अवलम्बन गरेको छ । सोही रणनीतिकै फलस्वरुप विगत दुई वर्षदेखि मातृमृत्युदरको अवस्था शुन्यमा झरेको छ । तर, चालु आर्थिक वर्षमा भने एक जना गर्भवती महिलाको मृत्यु भएकाले प्रभावकारी कार्ययोजनालाई अहिले थप सशक्त बनाइएको छ ।
यसैबीच, गाउँपालिका कार्यालयको स्वास्थ्य
शाखाद्धारा आज सुरक्षित मातृत्व सम्वन्धी अभिमुखीकरण तथा योजना तर्जुमा गोष्ठीका सहभागिहरुले मातृ मृत्युदर घटाउन महिलाको सम्पूर्ण स्वास्थ्य अवस्थामा सुधारको कार्यक्रम संचालन हुनुपर्नेमा जोड दिएका थिए । गोष्ठीमा स्वास्थ्यचौकी प्रमुख, स्वास्थ्यकर्मी र नर्सिङ्ग कर्मचारीहरुको सहभागिता थियो ।
