नेपालगन्ज, १२ वैशाख । बाँकेको नरैनापुर गाउँपालिकामा बाँके युृनेस्को क्लबले आयोजना गरेको पालिकास्तरीय स्वास्थ्यकर्मीहरूको क्षमता अभिवृद्धि तालिम आज शनिवार सम्पन्न भएको छ ।
हेलन केलर इन्टरनेशनल नेपालसँगको सहकार्य तथा स्वास्थ्य कार्यालय बाँकेको समन्वयमा क्लबद्धारा संचालित जीवनका लागि पोषण परियोजना अन्तर्गत उक्त तालिम दिइएको हो । समुदायस्तरमा पोषण सेवा प्रवाह गर्नुका साथै कुपोषणको प्रभावकारी व्यवस्थापनमा स्वास्थ्यकर्मीहरुको क्षमता अभिवृद्धि गर्नु तालिमको उद्देश्य रहेको बताइएको छ ।
तालिममा कुपोषित बालबालिकाको पहिचान, उपचार, प्रतिवेदन र सहजीकरण सम्बन्धी सीप विकासमा विशेष जोड दिइएको थियो । जसका कारण समुदाय तथा स्वास्थ्य संस्थामा गुणस्तरीय पोषण सेवा प्रवाहमा अपेक्षाकृत सहयोग पुग्ने विश्वास गरिएको छ ।
नरैनापुर गाउँपालिकाका अध्यक्ष इश्तियाकअहमदशाहको अध्यक्षतामा भएको तालिम समापन समारोहमा नरैनापुर गाउँपालिकाका स्वास्थ्य शाखा प्रमुख नागेन्द्रकुमार शाहले तालिमको उद्देश्य, लक्ष्य र अपेक्षित उपलब्धिबारे प्रकाश पार्नुभएको थियो ।
तालिम अद्यावधिक मार्गदर्शनका आधारमा ञ्चालन गरिएको थियो भने सहभागीहरूलाई प्रभावकारी सिकाइका लागि प्रस्तुति, समूहगत छलफल तथा व्यवहारिक अभ्यासमार्फत प्रशिक्षण दिइएको थियो ।
तालिम समापन कार्यक्रममा स्वास्थ्य कार्यालय बाँकेका प्रमुख सुनिता पौडेल र हेलन केलर इन्टरनेशनल नेपालका फिल्ड अधिकृत लिलबहादुर नेपालीको विशेष उपस्थिति रहेको थियो । तालिमको सहजीकरण जनस्वास्थ्य अधिकृत नागेन्द्र कुमार साह र विवेक पौडेलले गर्नुभएको थियो भने स्वास्थ्य कार्यालय बाँकेकी पोषण फोकल पर्सन बसन्ती मल्लले सहयोगीको भूमिका निर्वाह गर्नुभएको थियो ।
त्यस अवसरमा हेलन केलर इन्टरनेशनल नेपालका फिल्ड अधिकृत नेपालीले राष्ट्रिय पोषण स्क्रिनिङ अभियान सम्बन्धी मार्गदर्शन प्रस्तुत गर्दै अभियानको उद्देश्य, कार्यान्वयन प्रक्रिया र सूक्ष्म योजना (माइक्रो प्लानिङ) को महत्वबारे विस्तृत जानकारी गराउनुभएको थियो ।
तालिममा नरैनापुर गाउँपालिकाको वडा नम्बर १ देखि ६ सम्मका स्वास्थ्यकर्मी तथा पोषण सहजकर्तासहित २५ जनाको सहभागिता रहेको थियो ।
