नेपालगनञ्ज, २८ माघ । बाँके प्रतिनिधि सभा क्षेत्र नम्बर २ मा नेपाली कांग्रेसका उम्मेदवार शुधान्सु कोइरालाले आफुले अग्रजको सम्मानमा कहिल्यै कमी हुन नदिने प्रतिवद्धता दोहोर्याउनुभएको छ ।
नेपाली कांग्रेसमा थुप्रै अग्रजले योगदान गरेको स्मरण गर्दै उहाँले आफुले जहिले पनि अग्रजको सम्मान गर्ने बताउनुभयो । आज नेपालगनञ्ज उपमहानगरपालिका वडा नम्बर २ घरबारीटोलमा नेपाली कांग्रेसको प्रचार कार्यालय उद्घाटन कार्यक्रममा कोइरालाले बाँके कांग्रेस पूर्व सभापति एवम् आदर्श व्यक्तित्व स्वर्गीय रणेन्द्रबहादुर हमालको आदर्शलाई पछ्याउने प्रतिवद्धता समेत जनाउनुभयो ।
नेपाली कांग्रेसभित्र थुप्रै अग्रज नेताहरु हुँदाहुदै पनि पार्टीले आफुलाई प्रतिनिधि सभा सदस्य पदको उम्मेदवार बनाएको भन्दै कोइरालाले अग्रज नेताहरु, बाँकेका जनताहरु र कार्यकर्ताको साथ र सहयोगले आफुले चुनाव जित्ने दावी गर्नुभयो । ‘मैले विश्वास लिएको छु, नेपाली कांग्रेसले जुन क्षेत्रबाट टिकट दिएको छ, यो क्षेत्र सुशील कोइरालाको क्षेत्र हो, देशलाई संविधान दिएको सादगी नेताको क्षेत्र पनि हो । तसर्थ आफुले कहिल्यै पनि जालझेलको राजनीतिक नगर्ने विश्वास दिलाउनुभयो ।
नेपाली राजनीतिमा स्वर्गिय सुशिल कोइरालाले आफुलाई सादगी र निष्ठावान नेताको रुपमा चिनाएर गएको बताउँदै भन्नुभयो-‘स्वर्गीय नेता सुशील कोइरालाको निष्ठामा कुनै दाग लाग्न दिने छैन ।’ आफु प्रतिनिधि सभा सदस्य पदमा निर्वाचित भएपछि सुशासनको पक्षमा र भ्रष्टाचारका विरुद्ध आवाज उठाउने प्रतिवद्धता पनि कोइरालाले ददोहोर्याउनुभयो । ‘संसदमा म हजुरहरुको भावनाको कदर गर्नेछु, म मा कहिल्यै पनि घमण्ड नआओस्, हामीले धेरै क्षेत्रका लागि काम गर्नुपर्नेछ, हजुरको सेवक भएर काम गर्नेछु’, उम्मेदवार कोइरालाले भन्नुभयो ।
नेपाली कांग्रेस नेपालगन्ज-२ का वडा सभापति प्रदिप श्रेष्ठको सभापतित्वमा सम्पन्न कार्यक्रममा नेपाली कांग्रेस बाँकेका कार्यबाहक सभापति गोपालप्रसाद अधिकारी, नेपाली कांग्रेस क्षेत्र नम्बर २ का सभापति रमेशकुमार गुप्ता, महिला संघ बाँकेका सभापति नारायणी रुपाखेती लगायतले बोल्नुभएको थियो । कार्यक्रममा प्रजातन्त्र सेनानी रहमतअलि अन्सारी ‘मोलहे बाबा’ लाई सम्मान गरिएको थियो ।
मतदाता भेटघाटका क्रममा कोइरालाले बुधबार नै डुडुवा गाउँपालिकाको वडा नम्बर ३ को बाबुपुरुवा, तिवारीपुरुवा, वनकटवा, बनकट्टी, सुर्यलाल पुर लगायत गाउँमा मतदातालाई गर्नुभएको छ। यस्तै नेपालगनञ्ज उपमहानगरपालिका वडा नम्बर ६ सहित विभिन्न वडा तथा पेशागत संगठनका पदाधिकारीलाई पनि भेटेर आफुलाई सहयोग गर्न अपिल गर्नुभएको छ ।
