नेपालगञ्ज, २९ माघ । चुनावी सरगर्मी बढ्दै जाँदा बाँके क्षेत्र नम्बर १ का प्रतिनिधिसभा सदस्य पदका उम्मेदवार नारायण प्रसाद गौडेलले शिक्षा क्षेत्रका सरोकारवालासँग संवाद गर्नुभएको छ ।
प्याब्सन कोहलपुरले आयोजना गरेको ‘उम्मेदवारहरुसँग निजी विद्यालयका प्रतिनिधिहरुको वृहत्त शैक्षिक अन्तरक्रिया कार्यक्रम’ मा बोल्दै उहाँले निजी विद्यालयका जायज मागलाई कानून बनाएर सम्बोधन गर्न पहल गर्ने प्रतिबद्धता व्यक्त गर्नुभयो ।
कार्यक्रममा निजी विद्यालयका सञ्चालक, प्रिन्सिपल तथा शिक्षक प्रतिनिधिहरुले शिक्षा क्षेत्रका विद्यमान समस्या, नीति–नियमको अस्पष्टता र संसदमा विचाराधीन शिक्षा विधेयकबारे आफ्ना धारणा राखेका थिए । सोही सन्दर्भमा बोल्दै गौडेलले भन्नुभयो, “यहाँ निजी क्षेत्रका माग सम्बोधन गर्छु भनेर घोषणा मात्रै गरेर हुँदैन । यो नीति र कानूनसँग जोडिएको कुरा हो । जिताएर पठाउनुहोस् म त्यसका लागि संसदमा लड्छु ।”
उहाँले शिक्षा विधेयक अहिले संसदमा विचाराधीन अवस्थामा रहेको उल्लेख गर्दै निजी विद्यालयका प्रतिनिधिहरुको सुझाव र मागलाई आफूले विधेयक संशोधनको क्रममा समेट्ने प्रतिवद्धता जनाउनुभयो ।
गौडेलले शिक्षा क्षेत्र देशको मेरुदण्ड भएको उल्लेख गर्दै निजी क्षेत्रले शैक्षिक गुणस्तरमा उल्लेखनीय टेवा पुर्याएको बताउनुभयो । “निजी क्षेत्रले ठूलो रोजगारी सिर्जना गरेको छ । गुणस्तरीय शिक्षामा निजी क्षेत्रको योगदान अस्वीकार गर्न मिल्दैन,” उहाँले भन्नुभयो, “तर राज्यले निजी क्षेत्रप्रति गर्ने व्यवहार सधैं सकारात्मक भएको छैन भन्ने कुरा जायज छ ।”
उहाँले शिक्षा क्षेत्रमा देखिएका समस्या समाधानका लागि भावनात्मक भाषण भन्दा पनि नीतिगत स्पष्टता आवश्यक रहेको धारणा राख्नुभयो ।
उहाँले देशको विकासका लागि नीतिगत सुधार अहिलेको अपरिहार्यता रहेको बताउनुभयो । “विकास गर्छु भनेर भाषण गरेर मात्रै हुँदैन । त्यसका लागि कानून बनाउन आवश्यक छ,” उहाँले भन्नुभयो ।
बाँके क्षेत्र नम्ब१ मा चुनावी अभियानलाई तीब्र बनाउनुभएका गौडेलले विभिन्न क्षेत्रका समस्या, गुनासा सुन्ने काम गर्दै आउनुभएको छ ।
काँग्रेस बाँकेका सभापति समेत रहनुभएका गौडेलले त्यस्ता समस्याहरु पार्टीको नेतृत्व तहबाट गर्ने सकिने भए त्यसै अनुसार प्रतिवद्धता जनाइरहनुभएको छ भने नीतिगत ढंगबाट गरिने कुराहरु संसदमा आफू पुगेपछि गर्ने विश्वास दिलाउने गरेको काँग्रेस बाँके क्षेत्र नम्बर १ सचिव खुम बस्नेतलले बताउनुभयो ।
