नेपालगञ्ज, १६ माघ । सञ्चार क्षेत्रमा उल्लेखनीय योगदान पुर्याएकोमा रेडियो नेपाल बाँकेका संवाददाता आलम खान सम्मानित हुनुभएको छ । उहाँलाई नेपाल एपीएफ विद्यालय, कोहलपुरको छैठौं वार्षिकोत्सव तथा ‘अभिभावक दिवस’ को अवसरमा सम्मान गरिएको हो । कार्यक्रममा खानलगायत अभिभावक माया बुढाथोकी, बलबहादुर विष्टसहित विभिन्न महानुभावहरुलाई उत्कृष्ट अभिभावकको सम्मान प्रदान गरिएको थियो ।
कार्यक्रममा प्रमुख अतिथि सशस्त्र प्रहरी बल नेपाल नम्बर ५ बिध्याबासिनी बाहिनी मुख्यालयका बाहिनीपति सशस्त्र प्रहरी नायव महानिरीक्षक दिपेन्द्र कुँवरले खानलाई सम्मानपत्र प्रदान गर्नुभएको थियो ।
त्यस अवसरमा सशस्त्र प्रहरी नायव महानिरीक्षक कुँवरले विद्यालयहरुले गुणस्तरीय शिक्षामार्फत अनुशासित र सक्षम नागरिक उत्पादन गर्नुपर्नेमा जोड दिनुभयो।
विद्यालय व्यवस्थापन समितिका अध्यक्ष तथा नौवस्ता जवान तालिम शिक्षालयका समावेशक सशस्त्र प्रहरी वरिष्ठ उपरीक्षक नरेन्द्र बमले “मानव उत्कृष्टताका लागि शिक्षा” भन्ने नारालाई व्यवहारमा उतार्दै विद्यालय अघि बढिरहेको बताउनुभयो।
विद्यालयका समादेशक सशस्त्र प्रहरी उपरीक्षक नरबहादुर रावलले शैक्षिक गुणस्तर, अनुशासन र सह–पाठ्यक्रम गतिविधिमा एपीएफ स्कुलको पहिचान स्थापित हुँदै गएको बताउनुभयो।
त्यसैगरी कार्यक्रममा स्वागत मन्तव्य व्यक्त गर्दै विद्यालयका निमित्त प्रधानाध्यापक राजकुमार प्याकुरेलले हाल कक्षा १० सम्म पठनपाठन भइरहेको र विद्यालयमा ४२० जना विद्यार्थी अध्ययनरत रहेको जानकारी दिनुभयो।
वार्षिकोत्सवको अवसरमा विद्यालयका विद्यार्थीहरूले गायन, नृत्य, नाटक लगायत विविध सांस्कृतिक प्रस्तुति मार्फत आफ्ना प्रतिभा प्रदर्शन गरेका थिए ।
कार्यक्रममा सशस्त्र प्रहरी उपरीक्षक भिम चन्द, मानबहादुर शाही, नेपाल टेलिभिजन कोहलपुरका प्रमुख निराजन खनाल, नेपाल पत्रकार महासङ्घ बाँकेका उपाध्यक्ष करुणा शाह लगायतको उल्लेखनीय सहभागिता रहेको थियो ।
