नेपालगञ्ज, १६ पुस । गत एक वर्षको अवधिमा नेपाल-भारत सीमाको नेपालगञ्ज नाकावाट जोखिमपूर्ण यात्रामा रहेका ५४५ जनाको उद्दार गरिएको छ । माइती नेपालद्धारा उद्दार गरिएका ५४५ मध्ये सबैभन्दा बढी बाँकेका रहेका छन् । माइती नेपालका संयोजक केशव कोइरालाका अनुसार, उद्दार गरिएका मध्ये बाँकेका ८७ जना रहेका छन् ।
माइती नेपालले आज नेपालगञ्जमा सन् २०२५ को बार्षिक प्रतिवेदन सार्वजनिक गर्दै संयषेजक कोइरालाले एक वर्षको अवधिमा भारतका विभिन्न शहरमा श्रम र यौन शोषणमा परेका १४ जना महिला तथा बालबालिकाको समेत उद्दार गरिएको जानकारी दिनुभयो ।
संयोजक कोइरालाका अनुसार खोजतलासका लागि परेको ९२० निवेदन मध्ये ५९३ जना फेला परेका छन् । ‘हराएका मानिसको खोजि गर्ने काम अत्यन्त जटिल र चुनौतिपूर्ण छ, तथापी हामीले उनीहरुको सीमाबाट उद्धार, पारिवारिक पुनर्मिलन, खोजतलास, लैङ्गिक तथा घरेलु हिंसा, मुद्दा दर्ता र समाधानका क्षेत्रमा काम गरिरहेका छौ’-कोइरालाले भन्नुभयो ।
प्रतिवेदन सार्वजनिक कार्यक्रममा माइती नेपालले आगामी दिनमा पनि सीमा क्षेत्रमा हुने मानव बेचबिखन नियन्त्रण, हिंसामा परेका महिला तथा बालबालिकाको संरक्षण, कानुनी सहयोग र सामाजिक पुनर्स्थापनाका कार्यक्रमलाई थप प्रभावकारी बनाउँदै लैजाने प्रतिबद्धता जनाएको छ ।
कार्यक्रममा नेपाल पत्रकार महासंघ बाँकेका अध्यक्ष नवीन गिरीले मानव बेचविखन तथा ओसारपसार नियन्त्रण तथा न्यूनीकरणका लागि सचेतना प्रवर्द्धन र नीतिगत व्यवस्था तथा सुधारका लागि गहन ढंगले काम गर्नुपर्ने आवश्यकता औल्याउनुभयो ।
