नेपालगञ्ज, १३ मंसिर । नेपालगञ्जमा प्राइमो सेक्युरिटिज प्रालिले नेपालगञ्जमा आफ्नो शेयर बजार सम्वन्धि कारोवार सुरु गरेको छ । योसंगै नेपालगञ्जमा धितोपत्र बोर्डको ब्रोकर कार्यालयको सङ्ख्या तीन पुगेको छ । प्राइमोले आज नेपालगञ्जमका लगानीकर्तासँग साक्षात्कार गर्दै शेयर बजारको अवस्था र आफ्ना सेवावारे जानकारी दिएको छ ।
त्यस अवसरमा प्राइमोका संस्थापक सञ्चालक विजयबहादुर शाहले नेपालगञ्ज आर्थिक क्षेत्रका हिसाबले चलायमान शहर भएकाले यस क्षेत्रमा शेयर बजारको सम्भावना रहेको बताउनुभयो । शाहले शेयर बजार कारोबारवाट बाँके र बर्दियाका लगानीकर्ता लाभान्वित हुने विश्वास व्यक्त गर्नुभयो ।
नेपालगञ्जमा स्थापना भएका ब्रोकर कार्यालयहरुमा दाङ, सल्यान, बर्दिया, सुर्खेत लगायतका जिल्लाबाट शेयर कारोवारका लागि लगानीकर्ता आउने गर्छन् । नेपालगञ्जको शेयर बजारमा लगानीकर्ताले रु १ करोडदेखि ५ करोडसम्म दैनिक लगानी गर्दै आएको बताइएको छ ।
