बर्दिया, १६ भदौ । बर्दिया राजापुर नगरपालिकाका इन्दिरा चौधरी र गीता चौधरी केही महिना पहिलेसम्म काम तथा रोजगारी नपाएर हैरान हुनुहुन्थ्यो, तर, आज उहाँहरु दुबैजना दृढ संकल्प, लगनशीलता र आत्मविश्वासका जीवित उदाहरण बनेर देखाउन सफल हुनु भएको छ ।
प्लान इन्टरनेसनल नेपालसंगको साझेदारीमा बाँके युनेस्को क्लबले सञ्चालन गरेको ग्रीन इकोनोमी परियोजना अन्तर्गत बाँस बेतका सामाग्री बनाउने ३९० घण्टाको तालिम लिएपछि इन्दिरा र गीताको जीवन यात्रा परिवर्तन भएको हो ।
उहाँ दुबैजनाले अतिनै लगन र मिहिनेतका साथ सो कठिन र गहन तालिम सम्पन्न गरेपछि, अहिले उहाँहरूले बाँसका डाली, बाँसको फूल राख्ने भाँडो, टेबुल–कुर्सी लगायतका आकर्षक तथा बजारयोग्य सामग्री उत्पादन गरेर विक्रि समेत गर्न थाल्नु भएको छ । यसले उहाँहरू दुबैको जीवनमा सानो समयमै आर्थिक स्थिरता मात्र ल्याएको छैन, बरु उहाँहरूलाई आफ्नो भविष्य आफैं लेख्ने साहस र सम्मानपूर्ण जीवन जिउने आत्मविश्वास पनि दिएको छ ।
बाँसको सामाग्री निर्माणमा लागेका दुवै महिला आफ्नै स्थानीय बचत तथा ऋण सहकारी संस्थाकी सक्रिय सदस्य पनि हु्नुहुन्छ, जहाँ उहाँहरूले नियमित बचत र योगदानमार्फत आफ्नो परिवार मात्र होइन, सम्पूर्ण समुदायको आर्थिक सबलतामा सहयोग र प्रेरणा दिइरहनु भएको छ ।
बाँके युनेस्को क्लबद्धारा सञ्चालित ग्रीन इकोनोमी परियोजनाले बर्दियामा हरित रोजगारी सिर्जना गर्दै युवतीहरूलाई आत्मनिर्भर बनाउने, जलवायु परिवर्तनलाई न्यूनीकरण गर्ने र समाजलाई हरित अर्थतन्त्रतर्फ उन्मुख गराउने अद्वितीय योगदान दिएको छ ।
बाँसका सामाग्री बनाउन व्यस्त गीता चौधरी गर्वका साथ भन्नुहुन्छ, “बाँस बेतका सामाग्री बनाएर आत्मनिर्भर भएपछि मैले मेरो छोराको शिक्षा र उचित हेरचाहमा सहयोग गर्न पाएकी छु । मेरा सासु–ससुरा र श्रीमान पनि निकै खुशी हुनुहुन्छ र मलाई अझ बढी सम्मान र माया दिन थाल्नु भएकोछ ।”
बर्दिया राजापुरकी इन्दिरा र गीताको यो नयाँ पेशागत यात्राले स्पष्ट देखाएको छ—सीप र अवसर समयमै प्राप्त गरे भने महिलाहरूले पनि अन्य सरह जीवन मात्र परिवर्तन गर्दैनन्, आफ्नो परिवार, समुदाय र सम्पूर्ण समाजलाई समेत उज्यालो भविष्यतर्फ अगाडि बढाउन सक्छन् । दुबै जनाको यो साहसिक र सफल यात्राले समुदायका अन्य युवति र महिलाहरुलाई पनि केही गरेर अगाडी बढ्ने प्रेरणा प्रदान गरेको छ ।
यसैविच हाल आएर सो ग्रीन इकोनोमी परियोजना अन्तर्गत, बाँके युनेस्को क्लबका अध्यक्ष परवेज अली सिद्दीकी, कार्यकारी निर्देशक रवि कुमार तुलाधर, प्राविधिक सल्लाहकार साजिद अली सिद्दीकी, कार्यक्रम संयोजक राधे कृष्ण चौधरी र फील्ड सुपरभाइजर संजिता रिजालसहित एक टोलीले परियोजना क्षेत्रको भ्रमण गरेर लाभग्राहीहरूको बाँस हस्तकला अवलोकन गर्दै उनीहरूसँग अन्तरक्रिया तथा छलफल समेत गरेको छ ।
परियोजना अन्तर्गत तालिम लिएका गीता र इन्दिरा लगायतका लाभग्राहीहरूले आफुले गरेको प्रगति र देखिएका चुनौतीहरुका बारेमा खुलेर क्लबको टोलीसंग छलफल गरेका थिए ।
