नेपालगञ्ज, ४ असार । इस्लामिक कला, संस्कृतिको संरक्षण र सम्वर्धनका लागि राज्यवाट नीतिगत व्यवस्था हुनुपर्नेमा जोड दिइएको छ । नेपालगञ्ज उपमहानगरपालिकाको सहयोगमा द मदर फाउण्डेशनले आज नेपालगञ्जमा आयोजना गरेको अन्तरक्रिया कार्यक्रमका वक्ताहरुले इस्लाम धर्मावलम्बिहरुले आफुसंग भएका कला संस्कृतिको जर्गेना गदैृ त्यसको संरक्षण तथा सम्बर्धनका लागि सामूहिकरुपमा अभियानमुखी कार्यक्रम संचालन गर्नुपर्ने सुझावसमेत दिएका छन् ।
कार्यक्रममा नेपालगञ्जका मेयर प्रशान्त विष्टले इस्लाम धर्मावलम्बिहरुको प्राचिन कला, संस्कृतिको संरक्षणमा नेपालगञ्ज उपमहानगरपालिका सहयोग गर्न तत्पर रहेको बताउदै यसका लागि स्पष्ट प्रक्रियासहित कार्ययोजना तथा कार्यक्रम प्रस्तुत गर्नुपर्छ भन्नुभयो ।
सभापति को आसनवाट फाउण्डेशनका संस्थापक अध्यक्ष पूर्व न्यायाधिश डा. सलाउद्धिन अख्तर सिद्धिकीले फाउण्डेशनले इस्लाम धर्मावलम्बिहरुको मात्र नभई नेपालका सबै वर्ग समुदायको कला संस्कृतिको जर्गेना गर्नुपर्छ र यसको चिनारीलाई विश्वव्यापी बनाउनुपर्छ भनेर काम गरिहेको जानकारी दिनुभयो ।
अन्तरक्रिया कार्यक्रममा पत्रकार, सामाजिक अभियन्ता, जनप्रतिनिधि, विद्यार्थी, कलाकर्मी, विभिन्न पेशागत संगठनका प्रतिनिधिहरुको उपस्थिति रहेको थियो । त्यस अवसरमा नेपाली क्यालीग्राफरका अन्तर्राष्ट्रिय पुरस्कार विजेता शिफत सिद्धिकीलाई फुलमाला, खाँदा तथा सम्मानपत्र प्रदान गरिएको थियो । शिफतले अन्तर्राष्ट्रियस्तरको कार्यक्रममा नेपालको तर्पmवाट इस्लाम धर्मको कला तथा संस्कृति झल्किने क्यालीग्राफर कला प्रस्तुत गर्नुभएको थियो ।
कार्यक्रममा इस्लाम कला प्रतिष्ठानको स्थापना र नेपाली हजयात्री व्यवस्थापन ऐनको निर्माणका विषयमा नेपाल सरकारको सम्बद्ध निकायले उचित गृहकार्य थाल्नुपर्ने निर्णय समेत गरिएको फाउण्डेशनका संस्थापक अध्यक्ष सिद्धिकीले बताउनुभयो ।
