बर्दिया, ३ असार । बर्दिया जिल्लाका तीन विद्यालयलाई बिज्ञान विषयको ल्याब सामग्री निशुल्क उपलव्ध गराइएको छ । प्लान इन्टरनेशनल नेपालको सहयोगमा बाँके युनेस्को क्लबद्धारा संचालित सशक्त बालिका परियोजना कार्यक्रम अन्तर्गत विद्यालयहरुलाई बिज्ञान विषयको सामग्री उपलव्ध गराइएको हो ।
परियोजना संयोजक गोविन्द लामिछानेका अनुसार, बर्दिया मधुवन नगरपालिका वडा नं. ६ सानोश्रीको गुराँस नमूना विद्यालय, वडा नं. ४ ढोढरीको नेपाल राष्ट्रिय नमूना विद्यालय र वडा नं. १ सूर्यपटवाको त्रिभुवन माध्यमिक विद्यालयलाई रु दुई लाख ९३ हजार बढी मूल्यका सामग्री उपलव्ध गराइएको छ ।
आज गुराँस माविमा भएको पहिलो औपचारिक कार्यक्रममा प्रमुख अतिथि मधुवन नगरपालिकाका मेयर तेजबहादुर भाटले प्रधान अध्यापक केशव पौडेललाई ल्याब सामग्री हस्तान्तरण गर्नुभएको थियो । कार्यक्रममा विद्यालय व्यवस्थापन समितिका अध्यक्ष लालबहादुर खत्री, बाँके युनेस्को क्लबका प्रमुख संरक्षक प्रवेजअलि सिद्धिकी, अध्यक्ष रबि तुलाधरलगायतको उपस्थिति रहेको थियो ।
त्यस अवसरमा बाँके युनेस्को क्लबको टोलीले विद्यालयमा बिज्ञान विषय पढाईको अवस्था, ल्याब सामानको संरक्षण र प्रयोगका अवस्था, सिकाई अभिलेखिकरणलगायतका सम्बन्धमा प्रधान अध्यापक र शिक्षकहरुसंग जानकारी लिएको थियो ।
यसैगरी, नेपाल राष्ट्रिय माध्यमिक विद्यालयमा भएको कार्यक्रममा सहायक प्रधान अध्यापक विष्णु पोखरेललाई क्लबका अध्यक्ष तुलाधरले र त्रिभुवन माध्यमिक विद्यालयमा भएको कार्यक्रममा विद्यालयका सहायक प्रधान अध्यापक खिमा गौतमलाई क्लबका प्रमुख संरक्षक सिद्धिकीले सोही मूल्य बराबरका बिज्ञान विषयको ल्याब सामग्री हस्तान्तरण गर्नुभएको थियो । त्यस अवसरमा विद्यालयका अन्य शिक्षकहरुको पििन उपस्थिति रहेको थियो ।
प्लान इन्टरनेशन नेपालको सहयोगमा बाँके युनेस्को क्लबले साढे एक वर्षदेखि ग्रीन इकोनोमी परियोजना बर्दियाको राजापर र ठाकुरबाबा नगरपालिकामा, सशक्त बालिका परियोजना बढैयाताल गाउँपालिका, गुलरिया नगरपालिका र मधवन नगरपालिकामा र सुरक्षा परियोजना राजापुर नगरपालिका र मधुवन नगरपालिकामा संचालन गर्दै आएको छ । यी परियोजनाको अवधि तीन वर्षको रहेको कार्यक्रम अधिकृत राधेकृष्ण थारुले जानकारी दिनुभयो ।
तीन वटै परियोजनावाट मूलतः बालबालिका, किशोरीकिशोरी तथा युवाहरुको शिक्षा, स्वास्थ्य, सुरक्षा तथा व्यवसायिक विकासमा सघाउ पुर्याउने उद्देश्य र लक्ष्य राखिएको छ । परियोजनालाई सम्बद्ध पालिकाहरुले सघाइरहेको बताइएको छ ।
