नेपालगञ्ज, ३० जेठ । नेपालगञ्जमा भोलि शनिबार निशुल्क आयुर्वेद विशेषज्ञ स्वास्थ्य शिविर सञ्चालन हुनेभएको छ । नेपालगञ्ज उपमहानगरपालिका आयुर्वेद शाखाको आयोजनामा वडा नं. ४ गणेशपुरस्थित सहरी स्वास्थ्य प्रबद्र्धन केन्द्रमा शिविर सञ्चालन हुनलागेको हो ।
नेपालगञ्ज उपमहानगरपालिकामा आयोजित पत्रकार सम्मेलनमा आयुर्वेद शाखा प्रमुख डा.सुरेश पुनले शिविर विहान ८ बजेदेखि दिउसो ३ बजेसम्म सञ्चालन हुने जानकारी दिनुभयो । एक दिने उक्त शिविरमा करिब ५०० जनाको स्वास्थ्य जाँच गर्ने लक्ष्य राखिएको डा. पुनले बतउनुभयो । शिविरमा पाचन प्रणाली, अस्थिपञ्जर प्रणाली, स्नायु तथा मांशपेशी, मूत्र प्रणाली, श्वासप्रश्वास, छाला लगायत समस्या भएका विरामीहरुलाई सेवा दिइनेछ ।
शिविरमा डा. पुन डा. सरोजमणि पोख्रेल, डा. प्रवेश श्रीवास्तव, डा. आलोक पाण्डे, डा. गिता रेग्मी, डा. कृष्ण चापागाई, डा.अकबर अली, डा. मनोज कुमार यादवलगायत स्वास्थ्यकर्मीहरुले बिरामीको रोगको जाँच र निदान गर्नुहुनेछ । शिविरमा जाँच गरिएका विरामीहरुलाई औषधि समेत निशुल्क उपलव्ध गराइने बताइएको छ ।
पत्रकार सम्मेलनमा नेपालगञ्ज उपमहानगरपालिकाका कार्यवाहक मेयर कमरुद्दिन राईले आयुर्वेद स्वास्थ्य सेवालाई प्रभावकारी बनाइने प्रतिबद्धता जनाउनुभयो । पत्रकार सम्मेलनमा नेपालगञ्ज उपमहानगरपालिकाका प्रमुख प्रशासकीय अधिकृत रामहरि शर्मा, स्वास्थ्य महाशाखा प्रमुख रामबहादुर चन्द, नेपाल पत्रकार महासंघका महासचिव रामप्रसाद दाहाल, लुम्बिनी प्रदेश अध्यक्ष शुक्रऋषि चौलागाई, बाँके शाखा अध्यक्ष नवीन गिरी लगायत पत्रकारहरुको उपस्थिति थियो ।
