नेपालगञ्ज, २९ जेठ । बाँकेमा यस बर्षको मनसुनजन्य विपदबाट २५ हजार घरपरिवार प्रभावित हुनसक्ने पूर्वानुमान गरिएको छ । उक्त परिवारका करिब डेढ लाख नागरिक यसवाट प्रभावित हुनसक्ने जनाइएको छ । पूर्वानुमानका आधारमा तयार गरिएको विपद पूर्व तयारी तथा प्रतिकार्य योजना २०८२ (उन्नाइसौं अद्यावधिक) लाई सुझाव र परिमार्जनसहित अनुमोदन गर्ने निर्णय गरिएको छ ।
जिल्ला विपद व्यवस्थापन समितिको नेपालगञ्जमा बसेको बैठकले यसै योजनाका आधारमा विपद पूर्व तयारी र प्रतिकार्यका गतिविधि सञ्चालन गर्न निर्देशनसमेत दिदै आएको छ । स्थानीय तहहरुले पनि मनसुन शुरु हुनुअघि नै पूर्व तयारी तथा प्रतिकार्यका लागि सरोकारवालाको सहभागितामा बैठक बसी योजना निर्माण गर्ने निर्णय पनि गरिएको आपतकालीन कार्यसञ्चालन केन्द्रका सूचना व्यवस्थापन अधिकृत रुपन ज्ञवालीले जानकारी दिनुभयो । उहाँका अनुकसार, सबै स्थानीय तहहरुले अविलम्व आ—आफ्नो विपद् पूर्व तयारी तथा प्रतिकार्य योजना अद्यावधिक गर्ने निर्णय भएको छ ।
मनसुनजन्य विपदका घटनाहरुलाई प्रभावकारी प्रतिकार्यका लागि योजनाहरुको परीक्षण तथा स्रोत साधन र जनशक्ति परीक्षण तथा समन्वय सहकार्यलाई प्रभावकारी बनाउन बाढीजन्य विपदसँग सम्बन्धित कृत्रिम घटना अभ्यास गरिने भएको छ । नेपाली सेना, सशस्त्र प्रहरी बल, नेपाल प्रहरी, रेडक्रस, मानवीय सेवामा कार्यरत संघसंस्था, समुदायको सहभागिता तथा सबै पालिकाको समन्वयमा जेठ ३० गते विहान साढे सात बजे राप्ती नदीस्थित सिधनियाघाटमा कृत्रिम अभ्यास गरिने छ ।
बैठकमा गर्मीयामसंगै बाँकेमा आगलागी तथा ुलूु प्रतिकार्यका बारेमा छलफल पनि भएको छ । गर्मीयाममा हुन सक्ने आगलागी, डढेलो तथा ुलूु को प्रभावबाट जोगिन सवै सरोकारवालाहरुलाई थप प्रभावकारी बनाउन निर्देशन दिने, आगलागी, डढेलो, हावाहुरी, ुलूुृ बाट जोगिन कार्ययोजना अनुरुपका गतिविधिलाई निरन्तरता दिने, अन्तरपालिका समन्वयमा दमकल सेवालाई थप प्रभावकारी बनाउन अनुरोध गर्ने लगायतका निर्णय भएका छन् ।
बाँकेका प्रमुख जिल्ला अधिकारी एवम जिल्ला विपद व्यवस्थापन समितिका अध्यक्ष धर्मराज जोशीको अध्यक्षतामा स्थानीय सरकारका प्रमुख एवम प्रतिनिधिसहित सम्बन्धित सरोकारवालाको उपस्थितिमा बैठक बसेको थियो ।
