नेपालगञ्ज, २७ जेठ । बाँकेको जानकी गाउँपालिकास्थित एक जुत्ताचप्पल इण्डष्ट्रिजलाई रु. दुई लाख जरीवाना गरिएको छ । सो गाउँपालिकाको वडा नं. ३ मा रहेको लक्ष्मी फुटवेयर इण्डष्ट्रिजले नियम, कानूनविपरित जुत्तााचप्पल विक्री गर्दै आएको पाइएपछि उक्त जरीवाना गरिएको हो । आज बजार अनुगमनमा निस्केको बाणिज्य, आपूर्ति तथा उपभोक्ता संरक्षण कार्यालय नेपालगञ्जको टोलीले जरीवाना गरेको हो ।
उत्पादित जुत्ताचप्पलमा अधिकतम मूल्य (एमआरपी) कायम नगरी जुत्ता चप्पल बजारमा विक्रि वितरण गरेको पाइएपछि जरिवाना गरिएको बाणिज्य, आपूर्ति तथा उपभोक्ता संरक्षण कार्यालय नेपालगञ्जका प्रमुख हरिबहादुर खत्रीले बताउनुभयो । ‘कुनै पनि सामान उत्पादन गरेपछि अनिवार्यरुपमा त्यसको एमआरपी राख्नुपर्नेमा त्यसो नगरेको पाइएपछि उपभोक्ता संरक्षण ऐन बमोजिम जरीवाना गरिएको हो’-खत्रीले भन्नुभयो ।
चालू आर्थिक बर्ष २०८१÷०८२ को यो अवधिसम्म बाँकेमा कुनै उद्योग, व्यवासाय तथा प्रतिष्ठानलाई गरिएको यो नै सबैभन्दा ठूलो जरीवाना भएको बताइएको छ ।
